ԱՄՆ Սենատը բանաձև է ընդունել, որով հայտարարվում է, որ Վաշինգտոնի վարչակազմը պետք է դադարեցնի Իրանի դեմ ռազմական գործողությունները, հայտնում է ՏԱՍՍ-ը։
Բանաձևի օգտին քվեարկել է 50 սենատոր, իսկ դեմ՝ 48-ը։ Կողմ են քվեարկել նաև իշխող Հանրապետական կուսակցության չորս անդամ։ Դեմ է քվեարկել միայն մեկ դեմոկրատ։ Նմանատիպ բանաձև հաստատվել է Ներկայացուցիչների պալատում հունիսի սկզբին։
Այս տեսակի բանաձևերն ընդունվում են առանձին Կոնգրեսի յուրաքանչյուր պալատում։ Այն իրավական ուժ չունի և խորհրդատվական բնույթ ունի։ Նման փաստաթղթերում օրենսդիրներն արտահայտում են իրենց դիրքորոշումը։ ԱՄՆ կառավարության գործադիր իշխանությունն իրավունք ունի անտեսել դրանք։
Բանաձևում ընդգծվում է, որ ԱՄՆ նախագահ Դոնալդ Թրամփը պետք է «դուրս բերի ամերիկյան ուժերը Իրանի Իսլամական Հանրապետության դեմ մարտական գործողություններից»։ Դա պետք է արվի այն դեպքում, եթե Իրանի դեմ ռազմական գործողությունները չեն հաստատվել Կոնգրեսի կողմից, և նաև եթե այդ ուժերի ներկայությունը անհրաժեշտ չէ Միացյալ Նահանգներին կամ նրա դաշնակիցներին հարձակումից պաշտպանելու համար։
ԱՄՆ Սահմանադրությունը պատերազմ հայտարարելու լիազորությունը տալիս է Կոնգրեսին, այլ ոչ թե նախագահին։ Սակայն, վերջին տասնամյակների ընթացքում ամերիկացի առաջնորդները շատ լայնորեն են մեկնաբանել արտասահմանում ռազմական ուժ կիրառելու օրենսդրական լիազորությունները, այդ թվում՝ էապես նոր գործողություններ սկսելու համար։
ԱՄՆ-ի և Իսրայելի ռազմական գործողությունն Իրանի դեմ սկսվել էր փետրվարի 28-ին։ Հունիսի 18-ին ԱՄՆ-ն և Իրանը հուշագիր էին ստորագրել երկու երկրների միջև ռազմական գործողությունները դադարեցնելու վերաբերյալ: 14 կետից բաղկացած փաստաթղթով ևս 60 օրով երկարաձգում է ապրիլին կողմերի միջև հայտարարված հրադադարը, որի ընթացքում ԱՄՆ-ն և Իրանը պետք է համաձայնեցնեին վերջնական հրադադարը։ Շվեյցարիայում հունիսի 21-ին ավարտվել էր ԱՄՆ-ի և Իրանի միջև բանակցությունների առաջին փուլը, որը հիմնականում կրել էր տեխնիկական բնույթ։
