ՌԴ Սվերդլովսկի մարզում տորնադո է տեղի ունեցել, որի հետևանքով քաղաքի ենթակառուցվածքներ են վնասվել, հայտնում է «ՌԻԱ Նովոստին»՝ հղում անելով տեղական իշխանություններին։
Ականատեսները հայտնում են, որ փոթորիկը պոկել է տների տանիքներ, տապալել ծառեր և էլեկտրահաղորդման գծեր: Արդյունքում՝ Սվերդլովսկի մարզի որոշ բնակիչներ զրկվել են էլեկտրաէներգիայից:
«Այսօր մեր քաղաքը լուրջ մարտահրավերի առաջ կանգնեց։ Ուժեղ քամիները վնաս են հասցրել ենթակառուցվածքներին»,- VKontakte-ում գրել է Կուշվա քաղաքային շրջանի ղեկավար Միխայիլ Սլեպուխինը։
Նախնական տեղեկությունների համաձայն՝ զոհեր չկան։ Ավելի ուշ ռուսական ԶԼՄ-ները հայտնել են 6 տուժածի մասին։
Ural Mash-ի տվյալներով՝ մի քանի գյուղում տասնյակ տներ և մեքենաներ են վնասվել: Նշվում է, որ հզոր տորնադոն ուղեկցվել է ուժեղ անձրևով և կարկուտով։
