ԱՄՆ պետքարտուղարությունը հայտարարել է, որ Իսրայելի և Լիբանանի միջև հրադադարը կերկարաձգվի ևս 45 օրով։
«Մայիսի 14-ին և 15-ին Միացյալ Նահանգները երկու օր տևած չափազանց արդյունավետ բանակցություններ անցկացրեց Իսրայելի և Լիբանանի հետ։ Ապրիլի 16-ի հրադադարը կերկարաձգվի 45 օրով՝ շարունակական առաջընթաց ապահովելու համար (բանակցություններում - խմբ.)»,- գրել է Պետդեպարտամենտի խոսնակ Թոմի Պիգոթը X սոցիալական ցանցում։
Նրա խոսքով՝ «ԱՄՆ Պետդեպարտամենտը կվերսկսի քաղաքական բանակցությունները հունիսի 2-ին և 3-ին»։ «Ավելին, մայիսի 29-ին Պենտագոնը կսկսի անվտանգության վերաբերյալ բանակցություններ՝ երկու երկրների ռազմական պատվիրակությունների մասնակցությամբ», - ընդգծել է ԱՄՆ Պետդեպարտամենտի պաշտոնյան։
Պետդեպարտամենտը ողջունել է երկու կառավարությունների հանձնառությունը՝ երկարաժամկետ լուծում գտնելու հարցում։ ԱՄՆ-ն հայտարարել է, որ կշարունակի աջակցել երկու երկրներին ուղղություններով առաջ շարժվելիս։
Լիբանանի և Իսրայելի միջև հրադադարը պաշտոնապես ուժի մեջ է, սակայն Իսրայելի օդային և հրետանային հարվածները շարունակում են ամեն օր հարվածել Լիբանանի տարածքին։ Լիբանանում Իսրայելի հարձակումների հետևանքով զոհերի թիվը հասել է 2951-ի։
ԱՄՆ նախագահ Դոնալդ Թրամփն Իսրայելի վարչապետ Բենյամին Նեթանյահուի և Լիբանանի նախագահ Ջոզեֆ Աունի հետ ապրիլի 16-ին բանակցությունների արդյունքում հայտարարել էր Իսրայելի և Լիբանանի միջև տասնօրյա հրադադարի մասին: Ավելի ուշ հրադադարը երկարաձգվել էր։
