Հայ ազգային կոնգրես (ՀԱԿ) կուսակցության վարչապետի թեկնածու Լևոն Զուրաբյանն իր նախընտրական տեսահոլովակում հայտարարել է, որ Բաքուն, ստանալով Տավուշի մարզի սահմանամերձ գյուղերը, հրաժարվում է շարունակել սահմանազատման գործընթացը և դուրս չի բերում զորքերը Հայաստանի օկուպացված տարածքներից։
Ըստ նրա՝ չնայած պաշտոնական Երևանի միակողմանի զիջումներին, Ադրբեջանը հրաժարվում է ստորագրել խաղաղության պայմանագիրը և շարունակում է Հայաստանի շրջափակումը։ Փոխզիջումների գնալուց Բաքվի հրաժարվելու մասին է վկայում նաև այն, որ հայ գերիների վերադարձի հարցում որևէ առաջընթաց չկա։
Կոնգրեսի գնահատմամբ՝ կառավարության «Խաղաղության խաչմերուկ» նախագիծը չի կարող կայունություն երաշխավորել՝ դրանում առկա «թաքնված աշխարհաքաղաքական օրակարգերի» պատճառով։ Զուրաբյանի խոսքով՝ նախագծի առանցքային նպատակը Ռուսաստանի դուրսմղումն է տարածաշրջանից և Իրանի մեկուսացումը, ինչն անտեսում է նաև Չինաստանի ու Հնդկաստանի շահերը։ Նման միակողմանի մոտեցումը, ըստ թեկնածուի, ստեղծում է պայթյունավտանգ լարվածություն։
Որպես գործող իշխանության քաղաքականության այլընտրանք՝ ՀԱԿ-ն առաջարկում է անցնել «ԹՐԻՓՓ + ԲՐԻԿՍ» մոդելին: Զուրաբյանի պնդմամբ՝ այս ձևաչափը հնարավորություն կտա Հայաստանում համադրել գերտերությունների տրանզիտային շահերը՝ Հայաստանի համար ապահովելով «ինքնիշխան խաղաղություն»:
Հայաստանում մայիսի 8-ին պաշտոնապես մեկնարկել է հունիսի 7-ին նշանակված խորհրդարանական ընտրությունների նախընտրական քարոզարշավը։
Զուրաբյանը, որը 2025-ի վերջին ՀԱԿ-ի կողմից առաջադրվել էր վարչապետի թեկնածու, ապրիլի 10-ին հրավիրած ճեպազրույցում նշել էր, որ ընտրական պայքարի մեջ մտնում են որպես խաղաղության, ռացիոնալիզմի, ռազմավարական հաշվարկի, լիարժեք անկախության, պաշտպանության, տեխնոլոգիական հեղափոխության կուսակցություն։
