Ապրիլի 15-ին Հակակոռուպցիոն դատարանում մեկնարկել է «Տաշիր» ընկերությունների խմբի նախագահ, «Ուժեղ Հայաստան» կուսակցության վարչապետի թեկնածու Սամվել Կարապետյանի գործով առաջին դատական նիստը։
10:10 | Ոստիկանության ուժեղացված ծառայություն նիստից առաջ
Դատական նիստին ներկա է նաև Սամվել Կարապետյանը, դատարանի բակում են նրա աջակիցները, ուր կենտրոնացել են նաև բազմաթիվ ոստիկանական ուժեր։ Դատարանի բակից ուղիղ հեռարձակումը՝ Armenia Today-ի Youtube-ի ալիքում։
10:30 | Նիստի մեկնարկ, դռնբաց սկիզբ
Դատավոր Վահե Դոլմազյանի նախագահությամբ նիստը դռնբաց է։ Նիստի մեկնարկից առաջ Կարապետյանի փաստաբանական խումբն առարկեց լրատվամիջոցների կողմից դատական նիստի տեսանկարահանմանը, հեռարձակմանը և լուսանկարահանմանը։ Միևնույն ժամանակ, նրանք նշեցին, որ չեն առարկում դատական նիստերը դռնբաց անցկացնելուն և ձայնագրելուն։
Կարապետյանի փաստաբան Արամ Վարդևանյանը հայտարարեց, որ առարկության հիմքում կասկածն է, ըստ որի՝ իշխանությունը տեսանկարահանման հանգամանքը կարող է նախընտրական շրջանում օգտագործել իր ուզած ձևով։
Նա այդ համատեքստում մատնանշեց Կարապետյանի վարույթի «քաղաքական հետապնդման և ապօրինի» լինելու մասին։
«Քաղաքական հետապնդման տեսանկյունից ԶԼՄ-ների լուսաբանումն առավել քան կարևոր է։ Այս 10 ամիսներին ԶԼՄ-ների ջանասեր ու կարևոր աշխատանքը մեզ համար անգին է։ Միևնույն ժամանակ, օրերս այլ հանգամանք ենք նկատել։ Գործը հրատապ դատարան ուղարկելը կասկածներ է առաջացրել մեզ մոտ։ Օրինակ՝ գործով հսկող դատախազ Արգամ Դալլաքյանը, որը նաև ներկա է այստեղ, Հանրային հեռուստաընկերությամբ ներկայացնում է վարույթը՝ գործը միակողմանի ներկայացնելու հնարավորություն ստանալով»,- հայտարարել է նա։
Նա հավելել է, որ թե՛ այդ օրինակը, թե՛ գործը դատարան ուղարկելու դինամիկան հուշում են, որ նախընտրական փուլում «իշխանությունները մեկ այլ ասպեկտից են ներկայացնելու այս ակնհայտ քաղաքական հետապնդումը»։
Վարդևանյանը նաև նշել է, որ Կարապետյանը, մեծ հաշվով, չպետք է մեղադրյալ լիներ։
«Դատարանը, սակայն, ըստ օրենսդրության, նրան պետք է այդ եզրույթով դիմի։ Ու այդ ամենի հանրային լուսաբանումը քաղաքական մրցակցության պայմաններում ակնհայտ անարդար պայմաններ է ստեղծելու»,- ասել է Վարդևանյանը։
11:00 |
Armenia Today-ի թղթակցի փոխանցմամբ՝ դատավորը թույլատրել է դատական նիստը միայն ձայնագրել՝ առանց հեռարձակման ու նկարահանման։
Այս պահին դատական նիստը շարունակվում է։
12:00 |
Դատական նիստին գործով անցնողները, այդ թվում՝ Կարապետյանը, ներկայացան։ Կարապետյանը նշեց, որ տնտեսագետ է, դոկտորի կոչում ունի և բացի Հայաստանի քաղաքացիությունից, ունի նաև ՌԴ և Կիպրոսի քաղաքացիություն։ Նա շեշտեց, որ քաղաքացիության առնչությամբ գործընթացներ կան, քանի որ մասնակցելու է խորհրդարանական ընտրություններին և վարչապետի թեկնածու է։
«Քանի որ մասնակցում եմ ընտրություններին, և վստահ ենք հաղթանակի մեջ, այդ անձնագրերից՝ քաղաքացիությունից հրաժարվելու գործընթաց ենք սկսել»,- հայտարարել է Կարապետյանը։
12։30 |
Կարապետյանի փաստաբան Արմեն Ֆերոյանը նշեց, որ նախաքննության փուլում արդար, անաչառ դատաքննություն չի իրականացվել։ Փաստաբան Լիանա Գասպարյանը նշեց, որ Կարապետյանի ձերբակալումը ոչ իրավաչափ էր, խախտվել են նրա իրավունքները։
Փաստաբանները հայտարարեցին, որ դատավորին կամ դատախազներին բացարկ հայտնելու իմաստ չեն տեսնում, քանի որ նրանց փոփոխության դեպքում միայն ազգանուններն են փոխվելու։ Կարապետյանը նշեց, որ որպես Հայ Առաքելական եկեղեցու հետևորդ՝ չի առարկում դատախազ Դալլաքյանին բացարկ չհայտնելու փաստաբանների որոշումը և մեղադրող կողմին կոչ է անում առաջնորդվել խղճի թելադրանքով։
12։41 |
Դատարանը չառարկեց Կարապետյանի խափանման միջոցը փոխելու պաշտպանների՝ ապրիլի 14-ին ներկայացված միջնորդությունը քննարկել առաջնահերթ։
12։59 |
Դալլաքյանը միջնորդեց 3 ամսով երկարաձգել Կարապետյանի տնային կալանքը։
«Կան անձինք, որոնց վրա Կարապետյանը կարող է ազդեցություն ունենալ՝ հաշվի առնելով իր դիրքը։ Կան նաև վկաներ, որոնք դեռ չեն հարցաքննվել»,- հայտարարեց հսկող դատախազը։
13։45 |
Պաշտպանական խումբը հակադարձեց մեղադրող կողմին՝ հայտարարելով, որ տնային կալանքը երկարաձգելու միջնորդությունն անհիմն է։ Նրանք վերահաստատեցին Կարապետյանին տնային կալանքից ազատելու միջնորդությունը։
«Կարապետյանի նկատմամբ արդեն կիրառված են այլընտրանքային խափանման միջոցներ՝ գրավ և բացակայելու արգելք, որոնք ի զորու են երաշխավորել ցանկացած ռիսկ, եթե դատական վարույթում դատարանը դրանք դիտարկի»,- նշեց պաշտպանական կողմը՝ հայտարարելով, որ այդ ռիսկերն, իրականում, չկան։
«Կարապետյանի կողմից ենթադրյալ հանցանք կատարելու հիմքում միայն փաստաթղթեր են։ Դրանց զննության 81 արձանագրությունում, հարցաքննություններում Կարապետյանին վերագրված հանցանքների մասով որևէ փաստական տվյալ չկա»,- շեշտեցին փաստաբանները:
Փաստաբանները հայտարարեցին, որ Կարապետյանին տնային կալանքի տակ պահելը խախտում է նաև ԱԺ ընտրություններին մասնակցելու նրա սահմանադրական իրավունքը։ Նրանց խոսքով՝ Կարապետյանին տնային կալանի տակ պահելը «նրան պատժելու, ընտրական գործընթացներին մասնակցելու հիմնարար իրավունքից զրկելու նպատակ ունի»։
14:33 |
Կարապետյանի գործով դատական նիստը կշարունակվի ապրիլի 17-ին` ժամը 13։30-ին։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ: Դատարանը մարտի 14-ին ևս մեկ ամսով երկարաձգել էր նրա տնային կալանքը: «Ուժեղ Հայաստանն» ավելի ուշ հրապարակել էր ընտրություններին մասնակցող առաջին 36 թեկնածուի անունները։
