Իրանի արտաքին գործերի նախարար Աբբաս Արաղչին պատրաստում է հնարավոր միջուկային համաձայնագրի նախագիծ և առաջիկա օրերին մտադիր է այն ներկայացնել Միացյալ Նահանգներին, հայտնել է BBC-ն։
Ըստ հապարակման՝ միևնույն ժամանակ, Վաշինգտոնը քննարկում է Իրանի դեմ սահմանափակ ռազմական հարվածի հարցը։
Կայքի տվյալներով՝ Վաշինգտոնը և Թեհրանը շարունակում են անուղղակի շփումները Ժնևում, որտեղ որոշակի առաջընթաց են գրանցել, և իրանական կողմն արդեն աշխատում է հնարավոր համաձայնագրի տեքստի վրա։
Միևնույն ժամանակ, Միացյալ Նահանգներն ամրապնդում է իր ռազմական ներկայությունը տարածաշրջանում: Մերձավոր Արևելքում տեղակայվում են ավիակիրներ, լրացուցիչ նավեր, ինքնաթիռներ և հակաօդային պաշտպանության համակարգեր: ԱՄՆ նախագահ Դոնալդ Թրամփը, սակայն, խուսափում է մանրամասներից՝ չբացահայտելով ո՛չ հնարավոր գործողության ժամկետները, ո՛չ էլ նպատակները՝ ընդգծելով, որ որոշումները պահում է իր շրջանակների սահմաններում։
Ի պատասխան՝ Իրանն ամրապնդում է ռազմական կառույցները և ազդարարում լարվածության սրման պատրաստակամության մասին: Իրանի գերագույն առաջնորդ Ալի Խամենեին զգուշացրել է ամերիկյան ուժերի համար ռիսկերի մասին, իսկ երկրի իշխանությունները հայտարարել են ցանկացած հարձակմանն արձագանքելու իրենց պատրաստակամության մասին։
ԱՄՆ պետքարտուղար Մարկո Ռուբիոն փետրվարի 4-ին պնդել էր, որ ԱՄՆ-ի և Իրանի միջև էական բանակցությունները, միջուկային հարցից բացի, պետք է ներառեն նաև Իրանի հրթիռային ծրագիրը, Թեհրանի աջակցությունը Մերձավոր Արևելքի խմբավորումներին և «սեփական ժողովրդի նկատմամբ վերաբերմունքը»։ Իրանական կողմը, սակայն, արձագանքել էր, որ բանակցությունների ժամանակ կքննարկեն միայն Թեհրանի միջուկային ծրագիրը։
Արաղչին հայտարարել էր, որ ամերիկյան կողմի հետ փետրվարի 17-ին Ժնևում կայացած բանակցություններում մշակել են հիմնական սկզբունքները, որոնց հիման վրա աշխատելու են իրանական միջուկային գործարքի շուրջ:
Կարդացեք նաև՝
Իրանն ու ԱՄՆ-ն Ժնևում պայմանավորվել են միջուկային գործարքի սկզբունքների շուրջ
