«Առինջ մոլում» փետրվարի 13-ին հրդեհ է բռնկվել։ Ներքին գործերի նախարարության ճգնաժամային կառավարման ազգային կենտրոնն ահազանգն ստացել է ժամը 11։59-ին։
Փրկարար ծառայությունից հայտնել են, որ հրդեհ է բռնկվել առևտրի կենտրոնի տարածքում գտնվող խանութ սրահներից մեկի պահեստում։
Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, հրդեհաշիջման և փրկարարական աշխատանքների կազմակերպման բաժնի և Հոգեբանական աջակցության և բժշկական ապահովման վարչության հերթապահ խմբերը։
Shamshyan.com-ը հայտնել է, որ հրդեհը բռնկվել է «Առինջ մոլ»-ի թիվ 304 տաղավարում, որն ավելի շատ հայտնի է որպես ջահերի վաճառքի սրահ։ ԶԼՄ-ն նշել է, որ մինչ հրշեջների ժամանումը՝ կրակի տարածման դեմ պայքարել են առևտրի սրահի աշխատակիցները։ Ըստ նախնական տեղեկությունների՝ տուժածներ չկան։
Ավելի ուշ Armenia Today-ի նկարահանող խմբին «Առինջ մոլի» փոխտնօրեն Արմեն Ներսիսյանը տեղեկացրել է, որ հրդեհի ժամանակ ներսում աշխատողներ չկային։
Նա հավելել է, որ աշխատակիցները, տեսնելով ծուխը, չեն կարողացել միանգամից հանգցնել այն և զանգահարել են Փրկարար ծառայություն։
««Առինջ մոլի» աշխատանքը շարունակվում է: Կրակն այն մասում էր, որտեղ խոհանոցային ու գրասենյակային հատվածներն են»,- ասել է նա՝ հավելելով, որ վաճառքի ապրանքները վնասվել են ծխից։
Նյութը թարմացվել է 15։41-ին։
