ԱՄՆ-ն իր քաղաքացիներին կոչ է արել անհապաղ լքել Իրանը։ Ամերիկացիները պետք է դիտարկեն Իրանից ցամաքային ճանապարհով դեպի Հայաստան կամ Թուրքիա լքելու հնարավորությունը, ասված է Իրանում ԱՄՆ դեսպանության հայտարարության մեջ։
«ԱՄՆ քաղաքացիները պետք է ակնկալեն ինտերնետի շարունակական խափանումներ, նախատեսեն կապի այլընտրանքային միջոցներ և, եթե դա անվտանգ է, դիտարկեն Իրանից ցամաքային ճանապարհով Հայաստանով կամ Թուրքիայով հեռանալու հնարավորությունը»,- հորդորել է Վաշինգտոնը։
Դիվանագիտական ներկայացուցչությունում զգուշացրել են ԱՄՆ քաղաքացիների ձերբակալման բարձր ռիսկի մասին՝ ընդգծելով, որ ամերիկյան անձնագրի ցուցադրումը կամ ԱՄՆ-ի հետ կապերի առկայությունը կարող է դառնալ կալանավորման պատճառ։
Դեսպանության տեղեկացմամբ՝ փետրվարի 5-ի դրությամբ բաց է հայ-իրանական Ագարակ-Նորդուզ սահմանային անցակետը, իսկ ԱՄՆ քաղաքացիների մուտքը Հայաստան հնարավոր է առանց վիզայի՝ մինչև 180 օր ժամկետով։ Բաց են նաև Իրանի և Թուրքիայի միջև ցամաքային սահմանային անցումները՝ Գյուրբուլաք–Բազերգան, Կափիկյոյ–Ռազի և Էսենդերե–Սերով։ ԱՄՆ քաղաքացիները Թուրքիա կարող են մուտք գործել առանց վիզայի՝ մինչև 90 օր ժամկետով։
Միևնույն ժամանակ Ադրբեջանի ցամաքային սահմանները շարունակում են փակ մնալ, իսկ մուտքը հնարավոր է միայն հատուկ թույլտվությամբ։ Նման կարգ է գործում նաև Թուրքմենստանի դեպքում։
ԱՄՆ-ն և Իրանն այսօր՝ փետրվարի 6-ին, Օմանում բանակցություններ կանցկացնեն Թեհրանի միջուկային ծրագրի վերաբերյալ։ Իրանի պատվիրակությունը կգլխավորի արտգործնախարար Աբբաս Արաղչին, իսկ ԱՄՆ պատվիրակությունը՝ ԱՄՆ նախագահի հատուկ բանագնաց Սթիվ Ուիթքոֆը։
