«Մեր ձևով» շարժման համակարգող Նարեկ Կարապետյանը ներկայացրել է «Տաշիր» ընկերությունների խմբի ղեկավար Սամվել Կարապետյանի կողմից առաջարկված տնտեսական զարգացման հայեցակարգը։ Այն բաղկացած է հինգ առանցքային քայլերից, որոնք, ըստ նախաձեռնողների, կապահովեն Հայաստանի տնտեսական թռիչքն ու ժողովրդագրական կայունությունը։
Ավելի ուշ տեղի ունեցած մամուլի ասուլիսի ժամանակ Կարապետյանն Armenia Today-ին ասաց, որ այս քայլերը կներառվեն իր կողմից պատրաստվող ռազմավարական փաստաթղթում։
Կարապետյանի փոխանցմամբ՝ ծրագիրը հիմնված է իրական հատվածի զարգացման և չափելի արդյունքների վրա։ Ահա զարգացման հինգ հիմնասյուները.
300 000 նոր աշխատատեղ և արդյունաբերություն
Առաջնային է համարվում ներմուծման փոխարինումն ու տեղական արտադրության խթանումը։ Մարզերում նոր գործարանների հիմնումը թույլ կտա ստեղծել մինչև 300 հազար աշխատատեղ՝ էապես նվազեցնելով աղքատությունն ու արտագաղթը։
Փոքր բիզնեսի ազատում հարկերից
Առաջարկվում է փոքր ձեռնարկություններին ամբողջությամբ ազատել շրջանառության հարկից։ Սա հնարավորություն կտա հազարավոր ձեռներեցների զարգանալ առանց վարչարարական ճնշումների և դառնալ տնտեսության շարժիչ ուժը։
Դեղերի գների նվազեցում 20%-ով
Սոցիալական բաղադրիչի շրջանակում նախատեսվում է ներդնել դեղերի գների պետական կարգավորման մեխանիզմ (Վրաստանի փորձով)։ Նպատակը դեղորայքի շուկայում գների առնվազն 20% նվազեցումն է, ինչը կենսական է հատկապես թոշակառուների համար։
Գյուղատնտեսության պետական աջակցություն
Նախատեսվում է ստեղծել մթերման կայանների համապետական ցանց։ Պետությունը ֆերմերներին կապահովի երաշխավորված իրացման շուկայով, մատչելի պարարտանյութերով և կանխատեսելի եկամուտներով։
Մատչելի բնակարանաշինություն
Հինգերորդ քայլը պետության մասնակցությամբ լայնածավալ բնակարանաշինության իրականացումն է։ Սա ուղղված է բնակարանների շուկայական գների նվազեցմանը և երիտասարդ ընտանիքների համար սեփական տանիք ունենալու հարցի լուծմանը։
«Այս առաջարկները հիմնված են բազմամյա գործնական փորձի վրա։ Սա ոչ թե հայտարարությունների շարք է, այլ հստակ փուլերով իրագործվող տնտեսական քաղաքականություն»,- ընդգծել է Կարապետյանը։
Շնորհանդեսի ավարտին տեղի ունեցած մամուլի ասուլիսի ժամանակ Կարապետյանը հավելել է, որ մատչելի բնակարանաշինությունը դիտարկվում է նաև որպես միջոց՝ հակադարձելու Արցախից բռնի տեղահանվածների և արցախահայության արտագաղթի միտմանը։
Նրա խոսքով՝ քննարկվում է շուրջ 20 հազար բնակարանի ծրագիր, ինչպես նաև Երևանին մոտ առանձին թաղամաս/բնակելի գոտի ձևավորելու գաղափար՝ տեղահանվածների համար, որպեսզի հնարավոր լինի պահպանել համայնքային համախմբվածությունն ու մշակութային ինքնությունը։
Հայաստան-Թուրքիա հարաբերություններ և սահմանի բացում
Կարապետյանը նաև անդրադարձել է Հայաստան-Թուրքիա հարաբերություններին և սահմանի բացման թեմային՝ նշելով, որ ապաշրջափակումը կարող է տնտեսական օգուտներ տալ, սակայն անհրաժեշտ է վարել ինքնիշխան տնտեսական քաղաքականություն՝ ներքին շուկան պաշտպանելու համար, որպեսզի տեղական արտադրությունն ու գյուղատնտեսությունը չտուժեն սուբսիդավորվող էժան ներմուծումից։
«Տարիների ընթացքում արդեն կան ձևավորված տնտեսական միավորներ, որոնք ապրում են այդ գծի վրա, այսինքն՝ Թուրքիայից հագուստ են բերում, վաճառում են։ Մենք «Քաղաքացիական պայմանագիր» կուսակցությունում նման ռեակցիոն մոտեցման կողմնակից չենք, որ մարդկանց բիզնեսին հարվածենք, պետք է այլընտրանք առաջարկվի»,- նշել է նա։
Կարապետյանի խոսքով՝ Ադրբեջանի դեպքում խնդիրներ կան, որոնք պետք է լուծել, բայց երբ դու սկսելու ես փող ուղարկել Ադրբեջան, դրա դիմաց չստանալով ոչինչ, դա բերելու է ևս մի միակողմանի պայմանավորվածության։
Խոսելով TRIPP-ի մասին՝ նա նշել է, որ նախաձեռնությունն ունի թե՛ հնարավորություններ, թե՛ ռիսկեր՝ ընդգծելով անվտանգության և երաշխավորների գործոնի կարևորությունը։
Քայլերի իրականացման ժամկետները
Կարապետյանի խոսքով՝ վերոնշյալ ծրագրերը նախատեսում են իրականացնել մոտ հինգ տարվա ընթացքում՝ փուլային տրամաբանությամբ, իսկ փոքր բիզնեսի հարկային փոփոխությունները կարող են մտնել ուժի մեջ արդեն առաջին տարվա բյուջետային պլանավորման շրջանակում։
Armenia Today-ի հարցին, թե ինչպե՞ս են կոմպենսացնելու պետբյուջե դրամական այն մուտքերը, որոնք ապահովել են փոքր բիզներից առաջացած հարկերը, Կարապետյանը մի քանի կետ թվարկեց։
«Հարկային եկամուտները և եկամտահարկի, շինարարական բումի արդյունքում աշխատատեղերի շեշտակի աճը, սպառումը, երբ մարդկանց մոտ ֆինանսական նոր միջոցներ են գերազանցում սպառման մոտավորապես 20%-ը գնում է հարկ, մեծ ներդրումներ, մենք պատրաստվում ենք մեր գործընկերներին առաջարկել Հայաստանը որպես ներդրումային ճիշտ ուղղություն, առևտրային լավ ռեժիմներ, ազատ ռեժիմներ այն երկրների, այն գործարարների համար, ովքեր կուզենան աշխարհի հետ Հայաստանով առևտուր անել»,- նշեց Կարապետյանը։
