Երևանի փոխքաղաքապետ Արմեն Փամբուխչյանը մամուլի ասուլիսում անդրադարձել է մայրաքաղաքի փոսալցման աշխատանքներին, առաջիկա պլաններին, ինչպես նաև քաղաքացիների կողմից բարձրացված խնդիրներին:
Փամբուխչյանը նշել է, որ 2025-2026 թվականների ձմռանը Երևանում 2024 թվականի համեմատ 2,5 անգամ ավելի շատ աղ և ավազ է օգտագործվել փողոցները մաքրելու համար, ինչը, ըստ նրա, պայմանավորված էր եղանակային պայմաններով:
Ավելի վաղ Երևանի քաղաքապետ Տիգրան Ավինյանը հայտարարել էր, որ ճանապարհների բազմաթիվ փոսերը ձմռանը ձյունն աղով մաքրելու հետևանք են, և խոստացել էր սկսել փոսալցման աշխատանքներ:
Փամբուխչյանը, պատասխանելով Armenia Today-ի հարցին, թե որքա՞ն գումար է հատկացված ճանապարհաշինության համար, նշել է, որ 2026 թվականին ճանապարհների միջին նորոգման համար նախատեսված է 1,7 մլրդ դրամ, իսկ փոսային աշխատանքների համար՝ 1,1 մլրդ դրամ:
Ըստ նրա՝ պլանավորված աշխատանքների ցանկում են Գարեգին Նժդեհի, Տիգրան Մեծի, Ագաթանգեղոսի, Դեմիրճյան փողոցները, Եղվարդի խճուղին, Արամ Խաչատրյանի և Վիկտոր Համբարձումյանի փողոցները: Հիմնանորոգման պլաններում են Ավետիսյան փողոցը և Նուբարաշեն վարչական շրջանի 9-րդ փողոցը: Քննարկվում է նաև Արին Բերդի փողոցի հիմնանորոգման հնարավորությունը, ինչը, նրա խոսքով, խոստացել էին նախորդ տարի:
Չնայած փոսալցման աշխատանքների մեկնարկին՝ քաղաքացիներն ահազանգում են տեխնիկական նորմերի խախտումների մասին: Ակտիվիստ Արթուր Չախոյանը հրապարակել էր կադրեր՝ պնդելով, որ ասֆալտապատումն իրականացվում է առանց բիտումի օգտագործման:
«Իսկ հիմա ի՞նչ են ասելու, որ առանց բիտումի ասֆալտ են անում, հո հիմա չե՞ն ասելու՝ աղը շատ ենք ցանել»,- գրել էր նա։
Անդրադառնալով արձանագրված խախտմանը՝ Փամբուխչյանը հաստատել է, որ այնտեղ աշխատանքներն իրականացվել են առանց բիտումի:
«Դա Վարդանանց փողոցն է, նկատել ենք այդ խնդիրը, և այն պետք է ստանա պատշաճ լուծում։ Այսինքն՝ առանց բիտումի իրականացված աշխատանքը կքանդվի ամբողջությամբ: Այն ասֆալտը, որը ներկա պահին իրականացվել է, չի համապատասխանում մեր ստանդարտներին»,- ասել է Փամբուխչյանը:
Նա հստակեցրել է, որ ստանդարտներին չհամապատասխանող ասֆալտի դեպքում փոսալցման աշխատանքները կատարվելու են ոչ թե Երևանի բյուջեով, այլ ասֆալտապատում իրականացնող ընկերությունների հաշվին։
Հարցին, թե ինչո՞ւ շինբարեկարգման վարչությունը չի իրականացրել պատշաճ վերահսկողություն, Փամբուխչյանը հայտարարել է, որ երաշխիքային պայմանագրերը դեռ ուժի մեջ են, և կողմերը պարտավոր են կատարել իրենց պարտավորությունները:
Փոխքաղաքապետը պարզաբանել է, որ երաշխիքային պայմանագրի շրջանակներում շինարարները պարտավոր են անվճար շտկել իրենց աշխատանքները:
«Բնականաբար, գումար չի վճարվում, եթե երաշխիքի մեջ է։ Մենք ունենք բազմաթիվ դեպքեր, որ մեկ քանի անգամ նույն գործողությունը շինարարները կատարել են առանց վճարվելու, որովհետև եղել է երաշխիքի մեջ, և դրանք մեր ընթացակարգերի և կանոնների խախտմամբ աշխատանքներ էին»,- նշել է նա։
Armenia Today-ի հարցին ի պատասխան՝ նա նշել է, որ կազմակերպությունների հետ պայմանագրերով՝ ասֆալտապատումից հետո գործում է 1 տարվա երաշխիք։
