ԶԼՄ-ն հայտնել է Իրանի դեմ «առավելագույն ճնշման ռազմավարություն» կիրառելու Թրամփի ծրագրերի մասին

ԱՄՆ ընտրված նախագահ Դոնալդ Թրամփի խորհրդականների թիմն Իրանի դեմ պատժամիջոցները խստացնելու ծրագիր է պատրաստում, գրում է Bloomberg-ը՝ հղում անելով իր աղբյուրներին։

Հրատարակության համաձայն՝ Թրամփի առանցքային խորհրդականների միջև կա կոնսենսուս՝ Թեհրանի վրա «առավելագույն ճնշման ռազմավարությանը» վերադառնալու անհրաժեշտության վերաբերյալ՝ սկսած «պատժամիջոցների խոշոր փաթեթի ներդրմամբ, որը կհարվածի նավթային արդյունաբերության խոշոր խաղացողներին»: Նշվում է, որ նոր պատժամիջոցները կարող են սահմանվել արդեն փետրվարին։

Թրամփն իր առաջին պաշտոնավարման ընթացքում 2018 թվականի մայիսին ԱՄՆ-ին դուրս էր բերել Իրանի միջուկային համաձայնագրից և վերսկսել պատժամիջոցները Թեհրանի դեմ։ Մասնավորապես, 2018 թվականի օգոստոսին արգելք էր մտցվել ոսկու առևտրի և իրանական արժույթի, պետական ​​պարտքի հետ կապված գործարքների, Իրանի կառավարությանը դոլար վաճառելու վրա, իսկ նոյեմբերին՝ պատժամիջոցներ էին սահմանվել իրանական նավթի արտահանման դեմ։