ԱՄՆ-ն և Իրանը 12-րդ գիշերն է՝ անընդմեջ հարվածներ են հասցնում միմյանց, հայտնում է Reuters-ը։
Նշվում է, որ ԱՄՆ-ն թիրախավորել է Իրանի ծովային ենթակառուցվածքները, հրթիռների և անօդաչուների պահեստներն ու ՀՕՊ համակարգերը, իսկ Իրանը՝ Քուվեյթում գտնվող «Դոհա», «Ալի ալ Սալեմ» և «Արիֆջան» ամերիկյան ռազմակայանները։
CENTCOM-ի տվյալներով՝ գործողությունը տևել է շուրջ 5 ժամ։
ԱՄՆ-ն և Իսրայելը փետրվարի 28-ին պատերազմ էին սկսել Իրանի դեմ։ Հունիսին Վաշինգտոնն ու Թեհրանը ստորագրել էին ռազմական գործողությունների անհապաղ դադարեցման հուշագիր, սակայն հուլիսի 7-ից կողմերը վերսկսել էին փոխադարձ հարվածները։ Հուլիսի 12-ին Իրանը հայտարարել էր, որ Հորմուզի նեղուցով անցումը կվերականգնվի միայն իրավիճակի կարգավորումից հետո։
Հուլիսի 18-ին CENTCOM-ը հայտնել էր Իրանի ուղղությամբ գիշերային հարվածների յոթերորդ ալիքի ավարտի մասին, իսկ ԻՀՊԿ-ն սպառնացել էր անցնել լայնածավալ հարձակողական գործողությունների։
Կատարը, Եգիպտոսը, Պակիստանը և այլ միջնորդներ ԱՄՆ-ին ու Իրանին ներկայացրել են 10-օրյա հրադադարի առաջարկ։ Վաշինգտոնը պահանջում է ավելի երկար հրադադար և նավարկության ազատության վերաբերյալ նախնական համաձայնություն՝ մինչև կրակի դադարեցումը։
ԱՄՆ-ն և Իրանը փոխադարձ սպառնալիքներ են հնչեցրել․ Թեհրանը հայտարարել է, որ իր նավթի արտահանման սահմանափակման դեպքում տարածաշրջանում ոչ ոք չի կարողանա նավթ վաճառել, իսկ Վաշինգտոնը զգուշացրել է, որ Հորմուզի նեղուցում նավերի վրա հարձակումներին կպատասխանի իրանական ենթակառուցվածքների ոչնչացմամբ։
