Իրանը տարածաշրջանում ոչ մեկին թույլ չի տա նավթ վաճառել, եթե Թեհրանն ինքը չունի դա անելու հնարավորություն, հայտարարել է Իսլամական Հանրապետության խորհրդարանի նախագահ Մոհամմադ Բաղեր Ղալիբաֆը, փոխանցում է ՏԱՍՍ-ը։
«Տարածաշրջանում, որտեղ մենք նավթ չենք վաճառում, ոչ ոք նավթ չի վաճառի։ Եթե մեր անվտանգությունը չապահովվի, ոչ մի ենթակառուցվածք անվտանգ չի մնա, և Հորմուզի նեղուցը կարող է պաշտպանվել միայն առանց ամերիկյան ուժերի»,- գրել է նա և ընդգծել, որ այս հակամարտության կարգավորումը հանգեցրել է «ամեն ինչ կամ ոչինչ» կանոնին։
Իրանի արտաքին գործերի նախարար Աբբաս Արաղչին հայտարարել է, որ երկրի պաշտպանական դոկտրինը հավատարիմ է «ակն ընդ ական» սկզբունքին և զգուշացրել է ԱՄՆ-ին և նրա դաշնակիցներին զերծ մնալ քաղաքացիական ենթակառուցվածքների վրա հարձակումներից։
«Իրանի դեմ ցանկացած ագրեսիա, այդ թվում՝ մեր ենթակառուցվածքների վրա հարձակումները, կարժանանան ուժեղ և վճռական պատասխանի։ Նման ագրեսիան խթանող յուրաքանչյուր ոք, անկախ աջակցության ձևից, նույնպես կհամարվի օրինական թիրախ»,- նշել է նա։
Ավելի վաղ ԱՄՆ նախագահ Դոնալդ Թրամփը հայտարարել էր, որ իր երկրի զինված ուժերը կպատասխանեն Հորմուզի նեղուցում յուրաքանչյուր նավի վրա հարձակման՝ ոչնչացնելով մեկ իրանական կամուրջ կամ էլեկտրակայան։
ԱՄՆ-ն և Իրանը շարունակում են հարվածներ փոխանակել հրադադարի խափանումից հետո։ Ամերիկյան զինուժը հուլիսի 22-ի դրությամբ 11 գիշեր անընդմեջ հրետակոծել է Իրանի տարածքը։ Բացի այդ, Թրամփը հայտարարել էր թիրախների ցանկն ընդլայնելու հնարավորության մասին։
