Վենեսուելայում յոթօրյա ազգային սուգ է հայտարարվել հունիսի 24-ի ավերիչ երկրաշարժերի զոհերի հիշատակին, հայտնել է Reuters-ը՝ հղում անելով երկրի նախագահի պաշտոնակատար Դելսի Ռոդրիգեսի X-ում կատարած գրառմանը։
Գործակալության տվյալներով՝ երկրաշարժերի հետևանքով զոհերի թիվը հասել է 2295-ի։ Երկրում լայնորեն կիրառվող ոչ պաշտոնական ցուցակով անհետ կորած է համարվում 40 567 մարդ։
AP-ն գրում է, որ երկրաշարժերից հետո Վենեսուելայում աճում է բժշկական ճգնաժամի վտանգը․ հազարավոր տեղահանվածներ քնում են գերբնակեցված ապաստարաններում կամ բաց երկնքի տակ՝ մաքուր ջրի սահմանափակ հասանելիությամբ, իսկ բժիշկներն զգուշացնում են չբուժված վնասվածքների և վարակիչ հիվանդությունների ռիսկերի մասին։
The Guardian-ի փոխանցմամբ՝ Լա Գուայրայում փրկարարական աշխատանքները շարունակվել են բնակիչների դժգոհության ֆոնին․ պարբերականը գրել է, որ մարդիկ ձեռքերով փլատակներ են քանդել՝ հարազատներին գտնելու համար, իսկ քաղաքում արձանագրվել են նաև կողոպուտի դեպքեր։
Al Jazeera-ի տվյալներով՝ Վենեսուելայի իշխանությունները հայտնել էին 24 երկրից ստացված աջակցության, հարյուրավոր տոննա օգնության և հազարավոր օտարերկրյա փրկարարների ներգրավման մասին։
Վենեսուելայում հունիսի 24-ին տեղի ունեցած 7,2 և 7,5 մագնիտուդով երկրաշարժերի հետևանքով առավել շատ տուժել են Կարակասի մերձակայքի շրջաններն ու Լա Գուայրայի նահանգը, վնասվել են շենքեր և ենթակառուցվածքներ։ Հետագայում զոհերի թիվը, ըստ հրապարակված տվյալների, աճել էր՝ նախ հասնելով 235-ի, ապա 920-ի և գերազանցելով 1400-ը, իսկ հուլիսի 1-ին հաղորդվել էր 2295 զոհի մասին։ Կիլիկիո կաթողիկոսությունը հայտնել էր, որ տուժածների թվում անհետ կորած և վիրավոր հայեր կան, քանդվել է երկու հայ ընտանիքի տուն։
