Ռուսաստանի նախագահ Վլադիմիր Պուտինն ԱՄՆ նախագահ Դոնալդ Թրամփին տեղեկացրել է Հաղթանակի օրվա կապակցությամբ հրադադար հայտարարելու իր պատրաստակամության մասին, լրագրողներին հայտնել է Ռուսաստանի նախագահի օգնական Յուրի Ուշակովը, փոխանցում է ՌԲԿ-ն։
«Թրամփը բարձր է գնահատել Ռուսաստանի կողմից վերջերս հայտարարված Զատկի հրադադարը։ Այս առումով Պուտինն ամերիկացի գործընկերոջը տեղեկացրել է նաև Հաղթանակի օրվա տոնակատարությունների կապակցությամբ հրադադար հայտարարելու իր պատրաստակամության մասին»,- ասել է Ուշակովը։
Նա հավելել է, որ Թրամփն ակտիվորեն աջակցել է նախաձեռնությանը՝ նշելով, որ տոնը «հիշատակում է Երկրորդ համաշխարհային պատերազմում նացիզմի դեմ համատեղ հաղթանակը»։
Նախորդ տարի՝ Հաղթանակի օրվա 90-ամյակի առթիվ, Պուտինը մայիսի 8-ի կեսգիշերից մինչև մայիսի 11-ի կեսգիշեր հրադադար էր հայտարարել։ Սակայն Ռուսաստանի նախագահի խոսնակ Դմիտրի Պեսկովը հայտարարել էր, որ Մոսկվան «իրական հրադադար չի տեսել» Կիևից։
Մեկուկես ժամից ավելի տևած հեռախոսազրույցի ընթացքում Պուտինը Թրամփին նաև տեղեկացրել է ռազմական գործողությունների գոտում ստեղծված իրավիճակի մասին, որտեղ ռուսական զորքերը հետ են մղում Ուկրաինայի զինված ուժերին: Ուշակովի խոսքով՝ քաղաքական գործիչները համաձայնության են եկել, որ Կիևը, եվրոպական աջակցությամբ, «հետապնդում է հակամարտությունը երկարաձգելու քաղաքականություն»:
«Թրամփը կարծում է, որ Ուկրաինայում հակամարտությունը վերջ դնելու համաձայնագիրն արդեն մոտ է»,- հավելել է Ուշակովը:
Պուտինը և Թրամփը քննարկել են նաև քաղաքական այլ հարցեր, այդ թվում՝ Իրանի դեմ պատերազմը: Ռուսաստանի նախագահը կարծում է, որ ճիշտ է երկարաձգել հրադադարը, ինչը կնպաստի իրավիճակի կայունացմանը: Նա նաև դատապարտել է ապրիլի 25-ին «Վաշինգտոն Հիլթոն» հյուրանոցում Թրամփի դեմ կատարված մահափորձը և աջակցություն է հայտնել նրան:
2025 թվականի մայիսին Ուկրաինայի նախագահ Վլադիմիր Զելենսկին մերժել էր Հաղթանակի 80-ամյակի ընթացքում հրադադարի մասին Ռուսաստանի առաջարկը՝ հայտարարելով, որ Կիևը չի կարող երաշխավորել մայիսի 9-ի շքերթին Մոսկվա ժամանող օտարերկրյա հյուրերի անվտանգությունը։
