Ժողովրդական «Մեր ձևով» շարժման համակարգող Նարեկ Կարապետյանն առաջարկել է բազմազավակ ընտանիքների աջակցության միջոցառումներ, այդ թվում՝ երեք և ավելի երեխա ունեցող ընտանիքներին ապահովել բնակարաններով։
«Մեր հայկական մշակույթը, ընդհանրապես՝ ավանդույթները, ընտանիքակենտրոն են, և հայերի ճնշող մեծամասնության մոտ երջանկության հիմնական ցուցանիշը մեծ ընտանիքն է»,- ասել է նա իր տեսաուղերձում:
Կարապետյանի համոզմամբ՝ եթե կարողանան աջակցել հայ ընտանիքներին, որպեսզի նրանք դառնան ավելի բազմազավակ, հայ ազգն այս հարյուրամյակում տեղ կունենա տարածաշրջանում, տոկոսային դերն էլ կբարձրանա:
Նա շեշտել է, որ ըստ հարցումների՝ բնակարանի խնդիրն ամենամեծն է ՀՀ-ում, այդ պատճառով էլ երիտասարդ ընտանիքներն սպասում կամ մտորում են մինչև երրորդ կամ չորրորդ երեխա ունենալը:
«Մեր առաջարկն է, որ երրորդ երեխայից հետո բազմազավակ ընտանիքներին հնարավորություն տրվի լավ պայմաններով գնել բնակարաններ, պետությունն էլ աջակցի»,- ներկայացրել է Կարապետյանը:
Վերջինս հիշեցրել է, որ երիտասարդ ընտանիքների աջակցման ծրագրերը կիրառել էին նաև Արցախում, ինչը բերել էր նրան, որ Արցախում հետագա 2 տարվա ընթացքում 4-րդ երեխա ունենալու դեպքերն աճել էին 50%-ով:
«Նույնն առաջարկում ենք անել ամբողջ Հայաստանում, բայց այսպես՝ երրորդ և չորրորդ երեխայի դեպքում լուծել բնակարանային հարցը, այսինքն՝ վճարելի բնակարանի հիփոթեքի մի մասը, երկրորդ կարևոր բանը տնտեսական կայունությունն է, քանի որ Հայաստանն աշխարհի միակ երկիրն է, որտեղ մայրաքաղաքն ավելի շատ երեխա է ունենում, քան գյուղերը, «Մեր ձևով» շարժումը բազմաթիվ տնտեսական ծրագրեր է առաջարկել և առաջարկելու, որը, կարող եք վստահ լինել, հաստատ լավարկելու է մեր ընտանիքների տնտեսական վիճակը, և ամեն տարի մի քիչ ավելի լավ վիճակում ենք լինելու, ինչը բերելու է երիտասարդ ընտանիքների համար կայունացման»,- ասել է Կարապետյանը:
Կարդացեք նաև՝
Ի՞նչ է առաջարկում «Մեր ձևով» շարժումը Գեղարքունիքի զարգացման համար
