Բաքու կատարած այցի ընթացքում Ռուսաստանի փոխարտգործնախարար Միխայիլ Գալուզինը քննարկել է Ռուսաստանի և Ադրբեջանի միջև հարաբերությունների և Երևանի ու Բաքվի միջև հարաբերությունների կարգավորման հարցը, հայտնում է ՌԴ ԱԳՆ-ն։
Գերատեսչության տվյալներով՝ դեկտեմբերի 8-10-ը Գալուզինը խորհրդակցություններ է անցկացրել իր ադրբեջանցի գործընկեր Սամիր Շարիֆովի, ինչպես նաև հանդիպել Ադրբեջանի նախագահի օգնական Հիքմեթ Հաջիևի հետ: Բանակցությունների ընթացքում կողմերը վերահաստատել են «փոխադարձ հանձնառություն՝ ամրապնդելու հետագա համապարփակ քաղաքական երկխոսությունը և ընդլայնելու առևտրային, տնտեսական, մշակութային և մարդասիրական համագործակցությունը»:
ՌԴ-ն ընդգծել է Բաքվում նախկինում ձերբակալված 11 ռուս քաղաքացիների արագ ազատ արձակման կարևորությունը:
Հաղորդագրության համաձայն՝ կողմերը մանրամասն քննարկել են մի շարք տարածաշրջանային հարցեր, այդ թվում՝ հայ-ադրբեջանական հարաբերությունների կարգավորումը և Ռուսաստանի հնարավոր աջակցությունն այս գործընթացին՝ հիմնվելով 2020-2022 թվականներին ձեռք բերված եռակողմ բարձր մակարդակի համաձայնագրերի վրա:
Խորհրդակցության մասնակիցները նաև վերահաստատել են «Կասպյան հնգյակի» շրջանակներում համագործակցության ամրապնդման կարևորությունը և հետաքրքրություն են հայտնել «3+3» տարածաշրջանային համագործակցության հարթակի (Ռուսաստան-Իրան-Թուրքիա գումարած Ադրբեջան-Հայաստան-Վրաստան) անխափան գործունեությունը պահպանելու հարցում:
Ռուսաստանի և Ադրբեջանի միջև հարաբերությունները վատթարացել էին 2024 թվականի դեկտեմբերին AZAL ավիաընկերության ինքնաթիռի կործանումից հետո։ 2025 թվականի հուլիսին երկու երկրների միջև հարաբերությունները սրվել էին, երբ Ռուսաստանի քննչական կոմիտեն մեղադրանք էր առաջադրել Եկատերինբուրգում երկու մարդու մահվան պատճառ դարձած ռեյդի ժամանակ ձերբակալված մի խումբ ադրբեջանցիների։
Հոկտեմբերին Ռուսաստանի նախագահ Վլադիմիր Պուտինը Դուշանբեում հանդիպել էր իր ադրբեջանցի գործընկեր Իլհամ Ալիևի հետ, որից հետո երկու առաջնորդները հեռախոսազրույց էին ունեցել։
