ՀՀ վարչապետ Նիկոլ Փաշինյանը կոչ է արել բողոք հայտնել Հայ Առաքելական եկեղեցու պատարագի ժամանակ, եթե լսվի Ամենայն Հայոց կաթողիկոս Գարեգին Երկրորդի անունը։ Նա վերահաստատել է, որ դեկտեմբերի 28-ի պատարագին կլինի Գառնիի Սուրբ Աստվածածին եկեղեցում։
«Այստեղ էլ իմ ակնկալիքն այն է, որ Կտրիչ Ներսիսյանի անունը չհնչի պատարագի ժամանակ նախկինում բերված հիմնավորումներով և պատճառներով։ Ի դեպ՝ կան մարդիկ, ովքեր ասում են, որ իրենք տարբեր եկեղեցիներում, երբ պատարագի են մասնակցում և հնչում է Կտրիչ Ներսիսյանի անունը, իրենք ցանկություն ունեն իրենց բողոքն արտահայտել հենց այդ պահին, արդյոք նման բան կարելի՞ է և թույլատրելի՞ է»,- նշել է նա։
Վարչապետի խոսքով՝ դա լեգիտիմ ակնկալիք է, որ այն մարդիկ, ովքեր իրենց հայտարարագրել են որպես վեհ և որպես որոշակի կանոններով ապրող մարդիկ և չեն կատարել դա, չեն էլ պատրաստվում առերեսվել այս փաստի հետ, առաքելական Սուրբ եկեղեցու հետևորդները պետք է ոչ միայն վերաբերմունք ձևավորեն այդ փաստի առիթով, այլև պետք է արտահայտեն այդ վերաբերմունքը։
Փաշինյանը նաև հույս է հայտնել այդ վերաբերմունքից բխող գործնական արդյունքների հասնել։
Փաշինյանի հետ 10 եպիսկոպոսների հանդիպումից հետո, ովքեր պահանջում են կաթողիկոսի հրաժարականը, Հայաստանի իշխանություններն ուժեղացրել են եկեղեցու վրա ճնշումը։ Կառավարության որոշմամբ՝ պետական և համայնքային հողերն այլևս չեն փոխանցվի եկեղեցուն։ Կառավարությունը նաև լուծարել էր եկեղեցապատկան «Շողակաթ» հեռուստաընկերությունը։
