Թուրքիայի քաղաքական վարքի դրսևորումը, որը չի հետապնդում Հայաստանի անվտանգային համակարգի կազմաքանդում և որը չի ենթադրում Հայոց ցեղասպանության ոճրագործության շարունակականություն, այն նախադրյալն է, որ կհանգեցնի Հայաստան-Թուրքիա միջպետական, իսկ ապագայում գուցե նաև հայ-թուրքական հարաբերությունների կարգավորմանը, հայտարարել է ՀՅԴ Հայ դատի կենտրոնական խորհուրդը:
Հայոց ցեղասպանության զոհերի ոգեկոչման 111-րդ տարելիցին ընդառաջ՝ Հայ դատի խորհուրդը նշել է, որ Ցեղասպանությունը շարունակում է լինել հանցագործություն և կենսական վտանգ այնքան ժամանակ, քանի դեռ ցեղասպան կողմը չի ընդունել իր քաղաքական ու բարոյական պատասխանատվությունը, իսկ միջազգային հանրությունը չի պարտադրել դա։
«Հայ-թուրքական հարաբերություններում չկա՛ հակամարտություն դասական իմաստով։ Հետևաբար՝ միջպետական հարաբերությունների կարգավորմանը սխա՛լ է մոտենալ հակամարտությունների լուծման միջազգայնորեն ընդունված մեխանիզմներով։ Այս հարաբերություններում կա ցեղասպան կողմ, ում ոչ միայն ժխտողական քաղաքականությունը, այլև շարունակական գործողություններն են վկայում ցեղասպանական գործողությունների մտադրության պահպանման մասին, և կա ցեղասպանված կողմ, ով ցանկանում է բացառել ապագայում նման գործողությունների հավանականությունը»,- ասված է հայտարարարության մեջ։
Ըստ Հայ դատի՝ ասվածի լավագույն ապացույցը Հայաստան-Թուրքիա բանակցային գործընթացն է, երբ «Հայաստանի իշխանություններն անմտորեն և անվերապահորեն բավարարել են Թուրքիայի բոլոր նախապայմանները», իսկ թուրքական կողմը ոչ միայն հրաժարվում է գործադրել համաձայնեցված նույնիսկ խորհրդանշական քայլերը, այլև առաջադրում է նոր նախապայմաններ և շարունակում է Հայաստան-Թուրքիա հարաբերությունները պայմանավորել Հայաստան-Ադրբեջան հարաբերություններով։
«Թուրքական կողմը, ըստ էության, շարունակում է Հայաստանի Հանրապետությանը ենթարկել անօրինական շրջափակման, ինչն, իր բնույթով, թշնամական քաղաքականության դրսևորում է»,- նշված է հայտարարության մեջ։
Արդյունքում՝ ստեղծվել է իրավիճակ, երբ պաշտոնական Երևանի գործիքակազմում չի մնացել Հայաստան-Թուրքիա միջպետական հարաբերությունների կարգավորման գործընթացի վրա ազդելու որևէ գործուն հնարավորություն, նշել է Հայ դատը:
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 111-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 111 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Ստամբուլի իշխանությունները ինչպես հաճախ, այս տարի ևս մերժել են Հայոց ցեղասպանության զոհերի հիշատակին նվիրված միջոցառման անցկացման թույլտվությունը:
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Ուրուգվայից մինչև ԱՄՆ. Հայոց ցեղասպանության ճանաչման ուղին
