Հայաստանում մոտ օրերս տեղի կունենա Հայաստանի և Թուրքիայի ներկայացուցիչների հանդիպումը, ճեպազրույցում հայտնել է ԱԺ փոխխոսնակ Ռուբեն Ռուբինյանը։
Նրա խոսքով՝ օրակարգը ներառելու է Հայաստան-Թուրքիա հարաբերությունների կարգավորման գործընթացը և այն քայլերը, որոնք ընթացքի մեջ են։
«Մեր վերջին հանդիպումից հետո մի քանի թեմա է քննարկվել․ հանդիպում տեղի ունեցավ Կարս-Գյումրի երկաթգծի վերականգնման համար անհրաժեշտ պարամետրերը քննարկելու մասով։ Թեմա կա Անիի պատմական կամրջի վերականգնման վերաբերյալ։ Այս ամբողջ սպեկտրը կքննարկվի»,- հիշեցրել է Ռուբինյանը։
Ըստ ԱԺ փոխխոսնակի՝ Վաշինգտոնում օգոստոսի 8-ին կնքված հռչակագիրը, միանշանակ, դրական կազդի տարածաշրջանային, ինչպես նաև տարածաշրջանից դուրս տեղի ունեցող գործընթացների վրա։ Ռուբինյանը մանրամասնել է, որ կարգավորման ամբողջ գործընթացը սահմանների բացմանն ու դիվանագիտական հարաբերությունների հաստատմանն է վերաբերում։
«Երրորդ երկրների քաղաքացիների և դիվանագիտական անձնագիր կրող անձանց համար սահմանների բացման պայմանավորվածությունը չի իրագործվել մինչ այս պահը՝ ոչ մեր մեղքով, բայց մենք հավատում ենք, որ այն կիրագործվի»,- հավելել է Ռուբինյանը։
Սեպտեմբերի 7-ին հայտնի էր դարձել, որ Հայաստանի և Թուրքիայի պատվիրակությունները կհանդիպեն Մարգարա-Ալիջան անցակետի ֆինանսավորման հարցով։ ՀՀ ԱԳՆ-ն հաստատել էր հատուկ ներկայացուցիչներ Ռուբինյանի և Սերդար Քըլըչի հանդիպումը։
2022-ից Հայաստան-Թուրքիա կարգավորման գործընթացի հատուկ ներկայացուցիչները պաշտոնական հանդիպումներ են ունեցել։ 2024-ին կողմերը պայմանավորվել էին Հայաստան-Թուրքիա ցամաքային սահմանը հատելու հնավորություն ապահովել 3-րդ երկրների քաղաքացիների համար, բայց Ռուբինյանը հայտարարել էր, որ այդ հարցում թուրքական կողմից առաջընթաց չկա։ 6-րդ հանդիպումը տեղի էր ունեցել 2025-ի ապրիլին՝ Անթալիայի դիվանագիտական ֆորումի շրջանակներում, ուր կողմերը քննարկել էին Երևանի և Անկարայի միջև հարաբերությունների կարգավորման հարցը։
Թուրքիայի և Հայաստանի միջև դիվանագիտական հարաբերություններ չկան, իսկ երկու երկրների սահմանը փակ է 1993 թվականից՝ Անկարայի նախաձեռնությամբ։ Երկրներն արդեն 3 տարի փորձում են կարգավորել հարաբերությունները:
