Ֆրանսիան դատապարտել է Հայաստանի նկատմամբ Ադրբեջանի նոր պահանջները։ Ֆրանսիայի արտաքին գործերի նախարար Ժան-Նոել Բարոն անընդունելի է համարել Հայաստանի հետ խաղաղության համաձայնագրի շուրջ Ադրբեջանի նոր պայմանները, գրում է Nouvelles d ' Armenie en Ligne-ն։
Քաղաքական գործչի խոսքով՝ Հայաստանի և Ադրբեջանի միջև խաղաղության պայմանագրի ստորագրումը ձգձգվում է Հայաստանի սահմանադրությունը փոխելու Բաքվի պահանջի պատճառով։
Բարոն նաև մտահոգություն է հայտնել Ադրբեջանում դատվող արցախցի հայերի ճակատագրի վերաբերյալ: Նա հայտարարել է, որ Ֆրանսիան և ԵՄ-ն կոչ են անում նրանց ազատ արձակել կարգավորման գործընթացի շրջանակներում:
«Հարավային Կովկասը պետք է դառնա խաղաղության և բարգավաճման գոտի»,- ընդգծել է Բարոն՝ նշելով, որ ԵՄ-ն պատրաստ է աջակցել սահմանների բացմանը և տարածաշրջանում կայունության պահպանմանը:
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին՝ հայկական կողմի վերջին երկու կետերի վերաբերյալ Բաքվի առաջարկներն ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։
Վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։ Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։
