«Ուժեղ Հայաստան» կուսակցության ներկայացուցիչները բողոքի ակցիա են իրականացրել Ազգային ժողովի շենքի մոտակայքում՝ ընդդեմ Ընտրական օրենսգրքում փոփոխությունների վերաբերյալ «Քաղաքացիական պայմանագիր» խմբակցության նախագծի։ Նրանք ԱԺ-ի դարպասներին փակցրել էին «Փաշինյանը չի կարող կանգնեցնել փոփոխությունը» գրությամբ պաստառներ։
Օրենսգրքում փոփոխություններ և լրացումներ կատարելու մասին օրենքի նախագծով ՔՊ-ն առաջարկում է արգելել կուսակցությունների դաշինքների անվանումների մեջ անձնանունների օգտագործումը։ «Ուժեղ Հայաստանն» ընտրություններին մասնակցելու էր «Ուժեղ Հայաստան Սամվել Կարապետյանի հետ» դաշինքով, որն անձնանուն է պարունակում։
Կուսակցության ներկայացուցիչ իրավապաշտպան Գոհար Մելոյանը հայտարարել է, որ ՀՀ-ն խորհրդարանական երկիր է, և հենց ԱԺ-ն պետք է գործադիր իշխանությանը վերահսկի, մինչդեռ դարձել է գործադիր իշխանության կամակատար։
«Ինչո՞ւ ենք մենք այսօր այստեղ գտնվում, սա կոչ է և օրինակ յուրաքանչյուր հայ մարդու, գնացե՛ք հունիսի 7-ին տեղամասային կենտրոններ, տվեք Ձեր քվեն, որովհետև եթե դուք անվստահության արդյունքում հրաժարվում եք ներկա գտնվել և Ձեր ընտրությունը կատարել, դուք Ձեր բացակայությամբ կամ անգործությամբ ձեր ձայնը տալիս եք այսօր գործող իշխանությանը»,- շեշտել է նա։
Մելոյանի խոսքով՝ կուսակցությունը միջազգային գործընկերների հետ փակ հանդիպումների ժամանակ լսել է նրանց լուրջ վրդովմունքն ու զարմանքն իշխանության գործելաոճից։
«Ձեր ներկայությամբ երկու կոչ ենք հղում։ Խոսեցին հիբրիդային հարձակումներից, սրանից ավելի բացահայտ ընտրական գործընթացի միջամտության օրինակ չի լինում։ Եվ սա կոչ է նաև մեր քաղաքացուն, մենք քաղաքացուն կոչ ենք հղում, որ ինքն է առաջնային աղբյուրն իշխանության և պետք է չհանդուրժի՝ անկախ այն հանգամանքից՝ մե՞զ է սատարում, թե՞ որևէ այլ քաղաքական ուժի»,- պարզաբանել է նա։
Մելոյանի համոզմամբ՝ իշխանությունները շրջանցում են իրավական, սահմանադրական նորմերը, ենթադրվում են իրավական գործընթացներ՝ դատարաններ են շրջափակվում վարչապետի կոչով, մարդիկ քաղբանտարկյալ են դառնում, ու որևէ արձագանք չի լինում։
«Դա կոչվում է ճգնաժամ, մենք քաղաքական և սահմանադրաիրավական ճգնաժամային պայմաններում ենք, իսկ դուք ի՞նչ եք առաջարկում, մենք հիմա լուռ նստենք ամեն անգամ ու հանդուրժենք՝ ինչպես է հերթական լրջագույն սահմանադրաիրավական նորմը խախտվո՞ւմ»,- հակադարձել է Մելոյանը՝ մեկնաբանելով լրագողի հարցը, թե բողոքի ակցիան ԱԺ-ին չի խանգարի ընդունել նախագիծը։
Կուսակցության անդամ Արամ Վարդևանյանը ԸՕ փոփոխությունների մասին նախագծի քննարկումն անվանել է «պրիմիտիվ վախի դրսևորում»։
«Վերջերս տեսնում ենք՝ հաճախ գործադիր իշխանության այս պահի դրությամբ ղեկավարը խոսում է «ուժեղ տղերքի» մասին։ Բա ուժեղ տղերքն արդյոք քաղաքական հայտ ներկայացնելուց մի քանի օր առաջ հատուկ հրատապ կերպով Ընտրական օրենսգրքի փոփոխությո՞ւն են անում զուտ Սամվել Կարապետյան բառը, անունը, ազգանունը չօգտագործելու համար։ Բա սա արդյոք ուժեղ իշխանության դի՞րքն է»,- հարցրել է Վարդևանյանը։
Նրա կարծիքով՝ սոցիոլոգիական հարցումների տվյալներից պարզ է դառնում, որ սա վախեցած իշխանության վարքագիծ է։
«Երբ 10 ամիս առաջ հանրությունը տեսավ՝ ինչ աստիճան ակնհայտ ապօրինի քաղաքական հետապնդում մեկնարկեց Կարապետյանի նկատմամբ «մեր ձևով կմասնակցենք մեր Մայր Աթոռի պաշտպանությանը» նախադասության համար, դա ակնհայտ վախի դրսևորում էր։ Երբ Երևանում փակցվել էին Կարապետյանի լուսանկարները և ոստիկանության, քաղաքապետարանի ծառայողները համառորեն պայքարում էին ամեն մի լուսանկարի դեմ, դա վախի դրսևորում էր։ Երբ այսօր խոսում են այն մասին, որ Կարապետյան անձնանունը չի կարող օգտագործվել դաշինքի անվանման մեջ, սա ամենամեծ վախի դրսևորումն է»,- պարզաբանել է փաստաբանը։
Կուսակցության ներկայացուցիչ Ալեքսանդր Ալեքսանյանը հայտարարել է, որ այս իշխանություններից սպասելի է ամեն ինչ, սակայն ժողովրդի՝ փոփոոխությունների հասնելու կամքն անհնար է կոտրել։
«Վերջիվերջո, այս մարդիկ, այս իշխանականները պետք է հասկանան, որ հաջորդ վարչապետը լինելու է Կարապետյանը, մեր ժողովուրդն իր որոշումը կայացրել է, մեր ժողովրդին պետք են փոփոխություններ, ժողովուրդն էլ հասկացել է, թե իր համար լավ փոփոխություններ ու, առհասարակ, փոփոխություններ ով կարող է բերել»,- հայտարարել է նա։
Ալեքսանյանի խոսքով՝ այդ փոփոխությունները երկրին կարող է բերել Կարապետյանը, որն էլ իշխանությունների խուճապի պատճառն է։
Կարապետյանի կուսակցությունը մարտի 31-ին դաշինք ստեղծելու հուշագիր էր ստորագրել «Նոր դարաշրջան» և «Միավորված հայեր» կուսակցությունների հետ: Կարապետյանի ուժին սատարելու մասին հայտարարել են Հայաստանի ժողովրդավարական ազատական միությունը, ինչպես նաև «Կայունություն», «Ազատություն» և «Ժառանգություն» կուսակցությունները:
Հունիսի 7-ին կայանալիք խորհրդարանական ընտրություններին մասնակցելու հայտ են ներկայացրել մեկ տասնյակից ավելի քաղաքական ուժեր։ Կարապետյանի «Ուժեղ Հայաստան» կուսակցությունը, «Քաղաքացիական պայմանագիր» կուսակցությունը, «Միասնության թևեր» նախաձեռնությունը, Հայ ազգային կոնգրեսը (ՀԱԿ) և այլ քաղաքական ուժեր հայտարարել էին ընտրություններին մասնակցելու մտադրության մասին:
Ընտրական քարտեզի մասին ավելին կարող եք իմանալ Armenia Today-ի տեսանյութում:
