Հակակոռուպցիոն դատարանը մերժել է դատախազի՝ ՀՀ նախկին նախագահ Սերժ Սարգսյանի նկատմամբ բացակայելու արգելք կիրառելու վերաբերյալ միջնորդությունը, հայտնել է նրա փաստաբան Ռուբեն Հակոբյանը։
Հակակոռուպցիոն դատարանը՝ դատավոր Գիվի Հովհաննիսյանի նախագահությամբ, դատական նիստը վարել է դռնփակ ռեժիմով։
Նիստը նախապես հրավիրված չէր, այն հրավիրվել է հրատապության կարգով՝ հանրային մեղադրող Ծովակ Մնացականյանի միջնորդության հիման վրա՝ Սարգսյանի նկատմամբ որպես խափանման միջոց բացակայելու արգելք կիրառելու մասին։
ԱԺ «Պատիվ ունեմ» խմբակցության պատգամավոր Աննա Մկրտչյանը լրագրողների հետ զրույցում անդրադառնալով Սարգսյանի գործին՝ հայտարարել է, որ ՀՀ վարչապետ Նիկոլ Փաշինյանի հաղորդագրությունն է դատախազի օպերատիվ տվյալը, որով նախկին նախագահի խափանման միջոցի հրատապ հարց էին բերել։
«Ես գիտեմ՝ ինչ օպերատիվ տվյալ է։ Դուք էլ գիտեք։ Նիկոլի sms-ն է։ Ինչի՞, ձայնագրությունները չենք լսե՞լ՝ ուզենք-չուզենք կալանքը պիտի տանք, չենք տեսե՞լ դատարանի նախագահները ոնց են գնում Նիկոլի մոտ՝ ասելով 99-ին ենք կալանավորել, էն մեկը պլստացել է, բայց մի անհանգստացեք, նրան էլ կկալանավորենք, չե՞նք տեսել ֆեյսբուքյան ստատուսները»,- ասել է նա։
Պատգամավորը հավելել է, որ «իրավակարգերը վերացվել են Հայաստանում, բոլոր հանցագործությունները որպես կատարված փաստ արձանագրում են և անցնում առաջ»։
Դատից հետո Սարգսյանը մեկնաբանել է, որ երբևէ փախչելու մտադրություն չի ունեցել։
«Ես որտեղի՞ց եմ փախել, որ այստեղից փախչեմ, մահապատժի էլ ենթարկեն՝ կմնամ, սա իմ երկիրն է՝ ո՛չ իրենցը։ Այս օպերատիվ տվյալներով արդեն վաղուց փախած պիտի լինեի»,- ասել է նա։
Սեպտեմբերի 2-ին մեղադրող դատախազը պահանջել էր Սարգսյանից բռնագանձել մոտ 4 միլիարդ դրամ՝ Իսակովի պողոտայում նրա պաշտպանության նախարարի պաշտոնավարման ընթացքում հողամասերի օտարման գործով։ Մեղադրող կողմը գույքային պահանջ էր ներկայացրել նախկին նախագահի և մյուս մեղադրյալների դեմ։ Մեղադրողը խնդրել է նրանց ճանաչել գույքային պատասխանատու։
Գլխավոր դատախազությունը մարտին Սարգսյանին նոր մեղադրանք էր առաջադրել՝ առանձնապես խոշոր չափերով հափշտակության 18 դրվագով, առանձնապես խոշոր չափերով փողերի լվացման 2 դրվագով և դրա իրականացմանը նպաստելու 3 դրվագով։
