Շուրջ մեկ տարի կալանքի տակ գտնվող «Սև հովազ» ռազմահայրենասիրական կազմակերպության ղեկավար Սերոբ Գասպարյանի փաստաբանական թիմը հայտարարել է նրա առողջական վիճակի վատթարացման մասին։
Նրանք նշել են, որ Գասպարյանն իրենց արգելել էր խոսել առողջական վիճակի մասին, սակայն այլևս չեն կարող լռել։
«Հրամանատարը թիմին արգելել է հրապարակայնորեն խոսել առողջական խնդիրների մասին, սակայն լռությունը գործնականում դառնում է այս անօրինականությանը աջակցություն։ Գասպարյանը քրեակատարողական հիմնարկ է ընդունվել լիովին առողջ վիճակում, մինչդեռ ներկայումս ունի կյանքին վտանգ սպառնացող հիվանդություններ, որոնք, մեր գնահատմամբ, անհամատեղելի են կալանքի հետ»,- ասված է հայտարարության մեջ։
Փաստաբանները նշել են փորձաքննության անաչառության խնդրի մասին։
«Բժշկական փորձաքննություն իրականացնող մարմնի ղեկավարը գործով դատախազի հայրն է, ինչն առաջացնում է ակնհայտ շահերի բախում և խաթարում փորձաքննության օբյեկտիվության երաշխիքները, ինչով պայմանավորված` նման միջնորդություն ներկայացնել չենք կարող»,- հավելել են նրանք։
Ըստ փաստաբանննեի՝ Գասպարյանի գործով դատական նիստերը լավագույն դեպքում կայանում են ամսական մեկ անգամ, իսկ վերջին ամիսներին բազմիցս չեն կայացել նիստեր՝ Գասպարյանին դատարան չներկայացնելու պատճառաբանությամբ։
«Այս ամենի արդյունքում պետությանը ծառայած հրամանատարին թողնում են դանդաղ մահվան դեմ միայնակ պայքարի մեջ, ինչը իրավական պետությունում անթույլատրելի շքեղություն է»,- հավելել են փաստաբանները։
Նրանք պետական մարմիններից պահանջել են կազմակերպել անկախ, բազմապրոֆիլ բժշկական զննում քաղաքացիական մասնագիտացված կենտրոնում, վերանայել կալանավորումը և կիրառել ազատությունից չզրկող ու համաչափ խափանման միջոց՝ հաշվի առնելով Գասպարյանի առողջական վիճակն ու վաստակը։ Փաստաբանները նաև պահանջել են ապահովել նիստերի կանոնավոր անցկացում։
Փաստաբանական թիմը Գասպարյանի առողջական վիճակի վերաբերյալ հրապարակավ դիմում է ներկայացրել Հայաստանի Մարդու իրավունքների պաշտպանին, միջազգային կառույցներին, այդ թվում՝ ՀՀ-ում ԱՄՆ դեսպանատանը, Հայաստանում Եվրոպական միության պատվիրակությանը։ Միջազգային գործընկերներից փաստաբանները պահանջել են իրականացնել մոնիթորինգ, կազմակերպել այց քրեակատարողական հիմնարկ, դիտարկել դատավարությունը, հետաքննել Գասպարյանի կալանքի իրավաչափությունն ու բժշկական ապահովման բավարար լինելը։
Գասպարյանին մեղադրանք էր առաջադրվել Քրեական օրենսգրքի 43-419-րդ հոդվածի 1-ին մասով (իշխանության յուրացում նախապատրաստելը, պատժվում է ազատազրկում՝ մինչև 15 տարի ժամկետով):
