Վարչապետ Նիկոլ Փաշինյանի հետ վեճի բռնված արցախցի ակտիվիստ, քաղաքական գործիչ Արթուր Օսիպյանը ձերբակալման պահից մինչ այժմ զրկված է իր պաշտպաններին տեսակցելու հնարավորությունից, հայտնել է փաստաբան Ռոման Երիցյանը։
Նրա խոսքով՝ քրեական վարույթն ուղարկվել է Երևան քաղաքի քննչական վարչության ծանր հանցագործությունների քննության բաժին: Փաստաբանը նշել է, որ «կայծակնային արագությամբ ձեռնարկվում են քննչական գործողություններ, ինչը վկայում է սպասվող կալանքի միջնորդության մասին»։
Երիցյանը նաև հայտնել է, որ Օսիպյանի հեռախոսն անհասկանալի հանգամանքներում անհետացել է, էջերն էլ՝ ջնջվել։
Ավելի ուշ Երիցյանը հայտնել է, որ Օսիպյանին տեղափոխում են դատարան, ներկայացվել է կալանավորման վերաբերյալ միջնորդություն։ Նրան մեղադրանք է առաջադրվել քրեական օրենսգրքրի 330-րդ (բռնություն գործադրելու հրապարակային կոչեր), 297-րդ (խուլիգանություն) և 211-րդ (քարոզչություն կատարելուն կամ քարոզչություն կատարելուց հրաժարվելուն հարկադրելը կամ քարոզչություն կատարելուն այլ կերպ խոչընդոտելը) հոդվածներով։
Ավելի վաղ արցախցի գործչին մեղադրանք էր առաջադրվել խուլիգանության հոդվածով։
Արաբկիր վարչական շրջանում նախընտրական քարոզարշավի ընթացքում Օսիպյանը Փաշինյանին մեղադրել էր «ղարաբաղյան կլանին միլիարդներով սնելու մեջ»։ Քաղաքական գործիչը նաև պնդել էր, թե Փաշինյանը տեղյակ էր Արցախի նախկին նախագահ Արայիկ Հարությունյանի (որն այժմ գտնվում է Բաքվի բանտում-խմբ․) կողմից բաժանվող ընտրակաշառքների մասին, սակայն, չնայած դրան, աջակցել էր նրան։
Փաշինյանը հրապարակայնորեն հնչեցրել էր քաղաքացու անունը և վերջինիս հասցեին օգտագործել «համբալ» որակումը։ Միջադեպի ընթացքում վարչապետը դիմել էր Օսիպյանին՝ հետևյալ խոսքերով. «Գնայիր, զոհվեիր, դու խի ես կենդանի, ռադդ քաշի, համբալի մեկը»։ Հայաստանի ղեկավարը նաև հավելել էր. «Ծպտուններդ դուրս չգա, վե՛ր ընկեք տեղներդ, թալանչի՛ անասուններ»։
