«Ուժեղ Հայաստան» կուսակցության անդամ Գոհար Մելոյանն ահազանգով է դիմել՝ հայտնելով իրենց համակիրներին բերման ենթարկելու և խուզարկությունների մասին:
«Առավոտվանից արշավ է իրականացվում «Ուժեղ Հայաստանի» նկատմամբ։ Խուզարկություններ են, մեր համակիրների են բերման ենթարկել և մեր ցուցակի կին ներկայացուցիչ»,- նշել է նա։
Ըստ Մելոյանի՝ մտահոգիչ է, որ թիրախավորվում են կանայք: Նա, միաժամանակ, նկատել է՝ յուրաքանչյուր անձի փոխարեն, երբ փորձում են մեկուսացնել «հայրենիքի համար պայքարից, 10 մարդ համալրում է իրենց շարքերը»։
«Հիմա ուղևորվում ենք Հակակոռուպցիոն կոմիտե, ուղղակի ահազանգում եմ, որովհետև իրավապահ մարմինները խոչընդոտում են փաստաբանների աշխատանքը։ Ավելի եք մոտիվացնում մարդկանց նորմալ իրավական երկրում ապրելու համար պայքարել: Ինչ արած, մինչև հունիսի 7-ը ճանապարհ ունենք անցնելու»,- նշել է նա։
Փաստաբան Յուրա Դիլանյանը լրագրողներին հայտնել է, որ առավոտյան «Ուժեղ Հայաստան»-ի Արտաշատի բոլոր գրասենյակներում իրականացվել են խուզարկություներ, 11 անձ տարվել է անհայտ ուղղությամբ:
Ավելի ուշ Հակակոռուպցիոն կոմիտեից Armenia Today-ին հայտնել են, որ դեռևս չեն մեկնաբանում «Ուժեղ Հայաստան» կուսակցության համակիրներին բերման ենթարկելն ու խուզարկությունները։
«Ուժեղ Հայաստան» կուսակցության խոսնակ Մարինաննա Ղահրամանյանը լրագրողներին տեղեկացրել է, որ բերման ենթարկվածների թվում է նաև կուսակցության Արտաշատի գրասենյակի պատասխանատուն։ Նրա փոխանցմամբ՝ այս պահին բերման ենթարկվածների թիվը հասել է 15-ի, նրանցից մեկին մեղադրանք է առաջադրվել ընտրական փուլում «բարեգործական գործունեության արգելքով» պայմանավորված։
Նա տեղեկացրել է, որ փաստաբանների մի մասի աշխատանքը խոչընդոտվում է՝ նրանց չեն թույլատրում մուտք գործել և լիարժեք իրականացնել պաշտպանական գործառույթները։ Որոշ դեպքերում, խոսնակի փոխանցմամբ, ահազանգերից հետո փաստաբաններին հաջողվել է մուտք գործել Հակակոռուպցիոն կոմիտե։
Armenia Today-ին Ղահրամանյանը հայտնել է, որ բերման ենթարկվածների մի մասին էլ տարել են Հակակոռուպցիոն կոմիտեի Այգեձոր փողոցի ստորաբաժանում։
Հակակոռուպցիոն կոմիտեի խոսնակ Մարինա Օհանջանյանն Armenia Today-ին հայտնել է, որ կոմիտեում քննվող քրեական վարույթի շրջանակում ձերբակալվել է 14 անձ՝ ընտրակաշառք տալու և ստանալու մեղադրանքներով:
Փաստաբան Վահան Հովհաննիսյանը լրագրողներին հայտնել է, որ 14 բերման ենթարկվածից 2-ի նկատմամբ մեղադրանք է առաջադրվել «ընտրական փուլում բարեգործության արգելքը» խախտելու, ինչպես նաև ընտրակաշառքի հոդվածներով։
Հովհաննիսյանը նշել է, որ վարույթը վերագրվում է «Մեր ձևով» կազմակերպությունում ներգրավված անձանց։ Նրա խոսքով՝ «Մեր ձևով»-ը, երբ դեռ հասարակական կազմակերպություն էր, իրականացրել է բարեգործական և զարգացման ծրագրեր, որոնցում ներգրավված անձինք ստացել են աշխատավարձեր։
«Այժմ, ըստ վարույթն իրականացնող մարմնի, այդ աշխատավարձները դիտարկվում են որպես ընտրակաշառք։ Գուցե անձինք չեն աշխատել աշխատանքային պայմանագրերով, սակայն դա առավելագույնը կարող է դիտարկվել որպես աշխատանքային հարաբերությունների խախտում, ոչ թե քրեական իրավունքի ոլորտի հարց»,- նշել է փաստաբանը։
Կուսակցության խորհրդի անդամ Դավիթ Ղազինյանը լրագրողներին ասել է, որ պատրաստ են ցանկացած զարգացման։ Նրա խոսքով՝ «այսօրվա ձերբակալությունները նույնպես քաղաքական հետապնդման օրինակ են, սակայն իրենք ունեն բոլոր գործիքներն ու տարբերակները՝ իշխանության հնարավոր քայլերին հակազդելու համար»։
Ղազինյանը նաև չի բացառել, որ ձերբակալությունները կարող են օգտագործվել կուսակցության ընտրություններին մասնակցությունը սահմանափակելու նպատակով։
«Թող պահեն, որքան ուզում են, բայց պետք է հասկանան, որ «Ուժեղ Հայաստան»-ում կանայք էլ են ուժեղ»,-ասել է նա։
Ղազինյանն իշխանություններին է մեղադրել ընտրակաշառքի կիրառման մեջ՝ նշելով, որ ընտրություններից առաջ սոցիալական վճարների բարձրացումները «նախընտրական կաշառք» են։ Ղազինյանի խոսքով՝ անկախ ճնշումներից՝ կուսակցությունը շարունակելու է պայքարը։ Նա ընդգծել է, որ պատրաստ են նաև հետագա հնարավոր ճնշումներին, այդ թվում՝ ղեկավար կազմի թիրախավորմանը։
Նա հիշեցրել է, որ կուսակցության առաջնորդը՝ Սամվել Կարապետյանը, չի փախել, առաջինն է կանգնել պայքարի մեջ՝ ընդգծելով, որ որևէ գործընթաց չի կանգնեցնի իրենց։
ՀՀ ՄԻՊ-ը հայտնել է, որ ստացել է ահազանգեր փաստաբաններից առ այն, որ իրենց վստահորդներին արգելանքի են վերցրել և տեղափոխել են ՀՀ հակակոռուպցիոն կոմիտե, սակայն նրանց վստահորդներին տեսակցելու և պատշաճ իրավաբանական օգնություն ապահովելու հնարավորություն չի տրվում: Նշվում է, որ ՄԻՊ դիմած փաստաբաններին թույլատրվել է մուտք գործել Հակակոռուպցիոն կոմիտեի շենք և իրացնել անձանց իրավաբանական օգնություն ստանալու իրավունքը։
Հակակոռուպցիոն կոմիտեն ավելի ուշ ձայնագրություն է հրապարակել և հայտնել «ընտրակաշառք բաժանելու» մեղադրանքով քրեական վարույթ նախաձեռնելու մասին։ Ըստ կոմիտեի հաղորդագրության՝ բերման ենթարկվածներն ունեն ձերբակալվածի կարգավիճակ։
ՀԿԿ-ն «Ուժեղ Հայաստանի» անդամներին և նրանց հետ համագործակցող հասարակական կազմակերպության աշխատակիցներին մեղադրել է Արարատի մարզի Արտաշատ համայնքի մի շարք ընտրողների ընտրակաշառք բաժանելու մեջ:
Մելոյանը տեղեկացրել է, որ ձերբակալվածներից մեկի փաստաբանին թույլ չեն տալիս տեսակցել պաշտպանյալին։ Նա հայտնել է, որ փաստաբանը պատրաստվում է հանցագործության մասին հաղորդում ներկայացնել։ Նա նաև հայտնել է, որ ձերբակալվածները հիմնականում կանայք են։
«Ուժեղ Հայաստան» կուսակցության անդամների կողմից ենթադրյալ ընտրակաշառքներ բաժանելու կամ խոստանալու մասին իրավապահներն սկսել էին հաղորդում տարածել մարտի 30-ից: Ուժի ներկայացուցիչ, փաստաբան Վահան Հովհաննիսյանը, Armenia Today-ին մեկնաբանելով տեղի ունեցածը, այն որակել էր իրավական գործընթացների խեղաթյուրում և հայտնել, որ մարտի 30-ից սկսած՝ ամբողջ Հայաստանով տարբեր գրասենյակներից անձինք են հրավիրվում ոստիկանության բաժիններ՝ առանց համապատասխան իրավական հիմքերի։
Ապրիլի 14-ին Հակակոռուպցիոն կոմիտեն կուսակցության անդամներին՝ Գոհար Ղումաշյանին և Վերժինե Ստեփանյանին, ով նաև կուսակցության Վայքի գրասենյակի համակարգողն է, բերման էր ենթարկել։ Ղումաշյանը մեղադրվում է ենթադրյալ ընտրակաշառքի, իսկ Ստեփանյանը՝ ընտրողներին ակցիայի մասնակցելու հարկադրանքի հոդվածներով։ Ավելի ուշ դատարանը նրանց նկատմամբ վարչական հսկողություն էր կիրառել։
Կուսակցության քաղաքական խորհրդի ներկայացուցիչ Նարեկ Կարապետյանն ամերիկացի գործարար և բլոգեր Մարիո Նավֆալի հետ մարտին կայացած հարցազրույցում նշել էր՝ տեղեկություններ կան, որ իշխանությունները նախապատրաստում են քաղաքական ուժի ներկայացուցիչների ձերբակալություններ՝ նպատակ ունենալով թույլ չտալ նրանց մասնակցությունը նախընտրական գործընթացներին:
Թարմացված է՝ 16.04.2026 | 17։45
