Արցախի դեմ ագրեսիայի և միջազգային ահաբեկչության գործով դատապարտվածները փոխանցվել են Սիրիային, տեղեկանում ենք ՀՀ արդարադատության նախարարության հաղորդագրությունից։
Նշվում է, որ Հայաստանում ցմահ ազատազրկման դատապարտված Սիրիայի երկու քաղաքացի՝ Յուսեֆ Ալաաբեթ ալ-Հաջին և Մուհհռաբ Մուհամմադ ալ-Շխերին, Թուրքիայի միջոցով հունվարի 14-ին փոխանցվել են Սիրիայի իրավասու մարմիններին։
Փոխանցումն իրականացվել է համապատասխան իրավասու մարմինների միջև համագործակցության և կիրառվող իրավական մեխանիզմների ներքո, հավելել են ԱՆ-ից։
Հայաստանի և Ադրբեջանի միջև ռազմագերիների հնարավոր փոխանակման մասին ԶԼՄ-ները գրել էին 2025 թվականի սեպտեմբերին։ «Հրապարակը», հղում անելով իր աղբյուրներին, նշել էր, որ Հայաստանի ազգային անվտանգության ծառայության տնօրեն Անդրանիկ Սիմոնյանը Բաքու կատարած այցի ժամանակ առաջարկել էր ազատ արձակել տասը հայ ռազմագերիի՝ երկու երկրների միջև հարաբերությունների կարգավորման քննարկվող գործընթացի շրջանակներում։
Թերթը գրել էր, որ հայկական կողմն ադրբեջանական իշխանություններին էր փոխանցել 10 ռազմագերիներից բաղկացած ցուցակ, որում ընդգրկված էին Էրիկ Ղազարյանը, Լևոն Բալայանը, Դավիթ Ալավերդյանը, Մելիքսեթ Փաշայանը, Գարիկ Մարտիրոսյանը, Վասիլի Բեգլարյանը, Լյուդվիգ Մկրտչյանը, Ալյոշա Խոսրովյանը, Գուրգեն Ստեփանյանը, Մադաթ Բաբայանը։
Բաքուն, թերթի տվյալներով, ի պատասխան ներկայացրել էր փոխադարձ պայման՝ ազատ արձակել Սիրիայի վերոնշյալ երկու քաղաքացիներին, որոնք 2020 թվականի 44-օրյա պատերազմի ժամանակ մասնակցել էին մարտական գործողություններին Ադրբեջանի կողմից և Հայաստանում դատապարտվել ցմահ ազատազրկման։ Թերթի տեղեկություններով՝ հայկական կողմը տվել էր իր համաձայնությունն Ադրբեջանի պայմանին։
ՀՀ վարչապետ Նիկոլ Փաշինյանը հունվարի 14-ին հայտնել էր Ադրբեջանից չորս հայ գերիի փոխանցման մասին։ Նրանց թվում, սակայն, չկան այն անձինք, որոնց մասին գրել էր թերթը։
Սիրիայի երկու քաղաքացիները մեղադրվում են վարձկանության, միջազգային ահաբեկչության, վարձկանության, զինված ընդհարումների ժամանակ միջազգային մարդասիրական իրավունքի նորմերի լուրջ խախտումներ թույլ տալու փորձի մեջ։
