«Յելլ Էքստրիմ Պարկ»-ում օգօստոսի 24-ին քաղաքացին ընկել է ոչ թե զիփլայնից, այլ ռոլլեր լայնից, որը գետնից բարձր է 3-4 մետր, պարզաբանել են «Յելլ էքստրիմ պարկ» ընկերությունից:
ՆԳՆ փրկարար ծառայությունն օգոստոսի 24-ին հայտնել էր, որ Ենոքավան գյուղի զիփլայնի հարթակից քաղաքացին մոտ 3 մետր բարձրությունից ընկել է։
«Յելլ էքստրիմ պարկ»-ի հայտարարության մեջ ասվում է, որ անմիջապես կանչվել է շտապօգնություն, և տուժածը տեղափոխվել է հիվանդանոց։
«Ըստ մեր ունեցած տեղեկությունների՝ տուժածի կյանքին վտանգ չի սպառնում։ Նա ստացել է ոտքի կոտրվածք և ներկայումս գտնվում է հիվանդանոցում»,- ասված է հայտարարության մեջ։
Նշվում է նաև, որ ընկերությունում սկսվել է ներքին հետաքննություն՝ դեպքի բոլոր հանգամանքները պարզելու նպատակով, դեպքից անմիջապես հետո դադարեցվել են ռոլլեր լայնով թռիչքները։
