2022-ի սեպտեմբերի 13-ին Ադրբեջանը Սյունիքի, Գեղարքունիքի ու Վայոց ձորի ուղղությամբ հարձակում էր գործել, Ջերմուկի հատվածում ադրբեջանցիները մխրճվել էին 8,5 կմ լայնության ճակատով և մինչև 7,5 կմ խորությամբ:
Մտահոգություն կար, որ այս հարձակման հետևանքով քաղաքում զբոսաշրջիկների թիվն զգալիորեն կարող է նվազել:
2025թ. սեպտեմբերին մամուլը գրել էր, որ երկու ամիս առաջ ադրբեջանական զինուժը Ջերմուկի ուղղությամբ սահմանային հատվածում նոր դիրքեր է տեղակայել։ ՀՀ պաշտպանության նախարարությունը հայտարարել էր՝ տեղեկությունը չի համապատասխանում իրականությանը։
Հուլիսի 22-ին ՀՀ կառավարությունը հայտարարել էր, որ նախատեսում է շուրջ 6 միլիոն եվրոյի լրացուցիչ ֆինանսավորում՝ Ջերմուկի զբոսաշրջային գրավչության և ծառայությունների բարելավման նպատակով: Այս քայլը նպատակ ունի խթանել տարածաշրջանային զարգացմանը և բարելավել զբոսաշրջային ենթակառուցվածքները:
Armenia Today-ի նկարահանող խումբն այցելել է Ջերմուկ և բնակիչներից հետաքրքրվել, թե ինչպե՞ս են գնահատում անվտանգային իրավիճակը, ի՞նչ հետևանքներ է թողել քաղաքի զարգացման վրա այդ հարձակումը զբոսաշրջության տեսանկյունից:
Հարցման մասնակիցների մեծ մասը նշել է, որ ներկայումս քաղաքում հանգիստ է, սակայն 2022թ. դեպքերն իրենց ազդեցությունը թողել են:
Քաղաքացիներից մեկն ասել է, որ կրակոցներ վերջին անգամ 2024-ին է լսել, սակայն նկատում է, որ զբոսաշրջիկների թիվը պակասել է, թե որքան, չգիտի:
«Մինչև հիմա վախեցած են, ժողովուրդը դրսից ուզում է գալ, հարցնում են՝ կրակոցներ կա՞ն: Թուրքը կանգնած է մեր աչքի դեմը, ո՞նց չեն վախենա»,- ասել է նա:
Մեկ այլ քաղաքացի նկատել է, որ անվտանգ է զգում Ջերմուկում, և սխալ է որակել լուրերը, թե քաղաքում լարված է:
«Շատ ավելի արագ զարգացավ, քան մենք պատկերացնում էինք, որովհետև բավականին հանգստացողներ ունեցանք, ու գնալով ավելի աշխուժանում է շարժը»,- շեշտել է նա:
Կային նաև բնակիչներ, ովքեր նշում էին, որ չեն կարող անվտանգային տեսանկյունից հանգիստ լինել, եթե ադրբեջանական կողմի դիրքը մոտ հեռավորության վրա է գտնվում:
«Ո՞նց է անվտանգ, որ սարի վրա թուրքերը կանգնած են, եթե Ձեր տանը՝ երրորդ հարկն առանց պատալոկ թշնամին նստած լինի, պատալոկ էլ չունենաք, վտանգավոր չէ՞, սարի գլխից տեսնում են հեռադիտակով: Ամառ-ձմեռ այստեղ լիքն էին: Իրիկունը, որ նայեք բնակելի շենքը, 3-4 հատ լույս է վառվում ընդամենը»,- ասել է քաղաքացին:
Մանրամասները՝ Armenia Today-ի տեսանյութում:
