«Տաշիր» ընկերությունների խմբի նախագահ, բարերար Սամվել Կարապետյանը Երևան-Կենտրոն ՔԿՀ-ից հրապարակել է իր 8-րդ նամակը, որում խոսել է ՀՀ իշխանությունների «ձեռքբերումների» մասին։
Ըստ Կարապետյանի՝ նախ և առաջ ՀՀ-ում ուժգին հարված է հասցվել միավորող արժեքներին։
«Հերոսաբար կռվողները վերածվել են դասալիքների, հերոս զինվորները՝ մեկուսացած հաշմանդամություն ունեցողների, հերոսածին մայրերը՝ բողոքավոր որդեկորույսների, տարիներով պայքարող արցախցիները՝ անտուն փախստականների, երիտասարդներն ու ուսանողները՝ չկողմնորոշված մոլորյալների, որոնց ապագայի տեսլականը հայրենիքը լքելն է»,- նշել է Կարապետյանը:
Հաջորդը, նրա համոզմամբ, բիզնեսին հասցված վնասն է, երբ մասնավոր ոլորտը վերածել են «քերելու» առարկայի, իսկ գործարարին՝ թշնամու:
«Դրանով այս իշխանությանը հաջողվեց գրեթե ամբողջությամբ ոչնչացնել երկրի ներքին ներդրումային մթնոլորտը: Այս ամենը բերեց վերջին յոթ տարիների ընթացքում առավելապես զրո հավելյալ արժեք արտադրող ընկերությունների ստեղծման, իսկ օտարերկրյա ներդրողների համար դարձանք ոչ հետաքրքիր և անհեռանկարային երկիր»,- նշել է նա։
Ըստ գործարարի՝ իշխանություններն իրենց առաքելությունը պատվով կատարող լրագրողներին փորձել են մեկուսացնել, հիմնավոր ճիշտ խոսքը կամ քննադատությունը զրոյացնել՝ փոխարենն աղբ լցնելով հանրային խոսքի հարթակներում, հայհոյանքի միջոցով վախի մթնոլորտ ստեղծել:
«Նույնիսկ առաջին անգամ հայ տղամարդն անզոր եղավ պաշտպանելու իր կնոջ և դստեր արժանապատվությունը։ Միանշանակ է, որ Հայաստանը դարձնելու ենք բարեկեցության երկրիր, աղքատություն բառը թողնելու ենք անցյալում, և հանրային դաշտը հայհոյախառն աղբից մաքրվելու է»,- հավելել է Կարապետյանն իր ուղերձում։
Հունիսի 19-ին դատարանը երկու ամսով կալանավորել էր Կարապետյանին այն բանից հետո, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
Բագրատ արքեպիսկոպոս Գալստանյանը երկու ամսով կալանավորվել է
Վստահ եմ՝ ՔՊ-ում կան պարկեշտներ, որոնց խորհուրդ եմ տալիս չդառնալ ազգի նզովյալներ․ Կարապետյան
Իշխանությունները հասան կետի, որում ՀՀ-ն Սփյուռքից զրո ներդրում ունի․ Սամվել Կարապետյան
