Վարչապետ Նիկոլ Փաշինյանը երեկ «Համապարփակ անվտանգություն և դիմակայություն 2025» միջազգային համաժողովին հայտարարել է, որ բանակը պետք է լինի անվտանգության ամենավերջին գործիքը։ Այսպես է Փաշինյանն արձագանքել հարցին, թե ինչպե՞ս են ՀՀ անվտանգության պարամետրերի վերաբերյալ պատկերացումների մեջ էական հանգամանքներ փոխվել:
Նրա խոսքով՝ հարկավոր է արձանագրել և ձևակերպել, թե ի՞նչ նկատի ունենք անվտանգություն ասելով, ո՞ւմ և ինչի՞ անվտանգությունը նկատի ունենք, և ի՞նչ պարամետրերով է այն արտահայտվում:
«Երբ քո անվտանգության ապահովման թիվ մեկ գործիքը բանակն է, ուրեմն դու չունես անվտանգություն։ Բանակը նույնիսկ երկրորդ, երրորդ, չորրորդ, հինգերորդ գործիքը պետք է չլինի, բանակը պետք է լինի անվտանգության ամենավերջին գործիքը։ Մենք չենք էլ նկատել, թե ինչ բեռ ենք դրել մեր զինվորի ուսերին»,- ասել է նա։
Armenia Today-ի նկարահանող խումբը քաղաքացիներից հետաքրքրվել է՝ ըստ իրենց՝ ո՞րն է Հայաստանի թիվ մեկ անվտանգության գործիքը, ո՞ր տեղում պետք է լինի բանակը, և արդյոք համամի՞տ են վարչապետի խոսքերի հետ, որ երբ երկրի անվտանգության ապահովման թիվ մեկ գործիքը բանակն է, ուրեմն չունես անվտանգություն։
Հարցվածների մեծամասնությունը չի կիսում Փաշինյանի տեսակետը, նրանք ասել են, որ Հայաստանի թիվ մեկ անվտանգության գործիքը բանակն է։
«Ամբողջ աշխարհում նորմալ երկրներն ունենում են հզոր բանակ, կայուն տնտեսություն, նորմալ էկոնոմիկա, զարգացած աշխատանք, որ հզորացնեն բանակը, հիմա որ Ալիևը հարձակվի, ո՞վ պետք է պաշտպանի, բա ինչի՞ են ասում Պաշտպանության բանակ։ Փաշինյանը քիչ է հասկանում, մենք շատ ենք պահանջում»,- ասել է քաղաքացիներից մեկը։
Հարցման մեկ այլ մասնակցի խոսքով՝ Հայաստանի բանակը «դավաճանված է», այդ իսկ պատճառով էլ երկիրը հիմա նորմալ բանակ չունի:
«Այս դավաճանության պայմաններում մեր բանակը բանակ չէ։ Ոչ մի զինվոր չի գնա պաշտպանի։ Մեր ինքնությունը մեր միջից հանվում է, բանակ չկա արդեն։ Միայն փախուստը կլինի անվտանգության գործիք»,- նշել է նա։
Մեկ այլ մասնակցի կարծիքով՝ անվտանգության ամենակարևոր ցուցանիշը խաղաղությունն է, որը պետք է անպայման հաստատվի հարևանների հետ։
«Պետք է հարևանների հետ բարեկամություն հաստատենք, որպեսզի խաղաղություն լինի։ Դուք հարևաններ ունեք ձեր շենքում, չե՞ք աշխատում նրանց հետ լավ հարաբերություններ ունենալ»,- ասել է նա։
Ճշտող հարցին՝ արդյոք կցանկանա՞ր ունենալ ադրբեջանցի ընկերներ, քաղաքացին պատասխանել է․ «Այսինքն՝ դուք չունե՞ք այլազգի ընկերուհիներ»։
Հարցման մեկ այլ մասնակից էլ նշել է, որ դեմ չէ Ադրբեջանի հետ խաղաղության հաստատմանը, քանի որ ըստ նրա՝ հայերն ու ադրբեջանցիները նմանություն ունեն։
«Իրենք էլ ունեն պատմություն։ Ադրբեջանցիներն ավելի մարդկային են, քան մյուս ազգերը»,- ասել է նա։
Մանրամասները՝ Armenia Today-ի տեսանյութում։
