Միասնական սոցիալական ծառայությունը ՊՆ-ի հետ համատեղ ծրագիր է մշակել, որով զորացրվելուց մեկ ամիս առաջ ուսումնասիրվելու են զինծառայողների կարիքները։ Այս մասին Ազգային ժողովում հայտարարեց ՀՀ աշխատանքի և սոցիալական հարցերի նախարար Նարեկ Մկրտչյանը։
Ըստ Մկրտչյանի՝ զինծառայությունից հետո շատերն աշխատանք չգտնելու պատճառով հեռանում են երկրից։ «Այս առումով միասնական սոցիալական ծառայությունը գնահատում է զինծառայողների կարիքները զորացրվելուց մեկ ամիս առաջ»,- նշեց նա։
«Երբ որ մենք այդ տվյալներն ունենանք, մենք կնայենք, թե նրանց տնտեսական ակտիվացման ինչ ծրագրեր պետք է իրականացնենք։ Այդ կարիքները գնահատելուց առաջ կիրականացնենք որոշակի ծրագրեր»,- նշեց նախարարը՝ հավելելով, որ այս առումով գործատուների հետ ևս փոխըմբռնում կա։
