Իսրայելի պաշտպանության ուժերը կմնան Լիբանանի հարավում գտնվող անվտանգության գոտում՝ համաձայն Բեյրութի հետ շրջանակային համաձայնագրի և կպահպանեն վերահսկողությունը տեղում՝ մինչև «Հեզբոլլահի» զինաթափումը, հայտարարել է Իսրայելի վարչապետ Բենիամին Նեթանյահուն։
Նեթանյահուի խոսքով՝ ԱՄՆ-ում Իսրայելի և Լիբանանի ներկայացուցիչների միջև բանակցությունները հրեական պետության համար «մեծ նվաճում են»։
«Ամենակարևորն այն է, որ Իսրայելը մնա Լիբանանի հարավում գտնվող անվտանգության գոտում։ Սա մեծ նվաճում է, և մենք կաջակցենք դրան՝ մինչև «Հեզբոլլահի» զինաթափումը, քանի դեռ Իսրայել պետության համար սպառնալիքը մնում է»,- տեսաուղերձում ասել է Իսրայելի վարչապետը։
Հունիսի 26-ին Իսրայելն ու Լիբանանը շրջանակային համաձայնագիր էին ստորագրել Իսրայելի և լիբանանյան «Հեզբոլլահ» շարժման միջև ռազմական գործողությունները դադարեցնելու վերաբերյալ։ ԱՄՆ-ի հովանու ներքո լիբանանա-իսրայելական բանակցությունների հինգերորդ փուլն ընթացել էր Վաշինգտոնում հունիսի 23-25-ը:
Լիբանանի առողջապահության նախարարության տվյալներով՝ մարտի 2-ին ռազմական գործողությունների սկսվելուց ի վեր Իսրայելի հարվածների հետևանքով զոհվել էր 4230 մարդ, վիրավորվել՝ 12 179-ը։ Մարտերի ընթացքում զոհվել էր 32 իսրայելցի զինվոր և քաղաքացիական 4 անձ։ Ավելի վաղ հաղորդվել էր, որ Իրանը և Միացյալ Նահանգները Շվեյցարիայում կայացած բանակցությունների ժամանակ համաձայնության են եկել Լիբանանում Իսրայելի և «Հեզբոլլահ»-ի միջև մարտական գործողությունները դադարեցնելու մեխանիզմի շուրջ։
