Անգլիայի թագավորի եղբայրը՝ արքայազն Էնդրյուն, կդադարի օգտագործել Յորքի դուքսի տիտղոսը՝ ամերիկացի ֆինանսիստ Ջեֆրի Էպշտեյնի հետ կապերի պատճառով, հայտնում է ՏԱՍՍ-ը։
«Թագավորի [Չարլզ III] և իմ ընտանիքի անդամների հետ քննարկումներից հետո եզրակացրեցինք, որ իմ դեմ շարունակվող մեղադրանքները շեղում են ուշադրությունը Նորին մեծության և թագավորական ընտանիքի աշխատանքից։ Որոշել եմ իմ ընտանիքի և երկրի նկատմամբ պարտավորությունները դնել առաջին տեղում։ Ես պնդում եմ հինգ տարի առաջ կայացրած որոշումս՝ հեռանալ հասարակական կյանքից։ Նորին մեծության համաձայնությամբ՝ զգում ենք, որ պետք է հիմա ևս մեկ քայլ անեմ։ Հետևաբար, այլևս չեմ օգտագործի իմ տիտղոսը կամ ստացած պարգևները»,- արքայազնի խոսքերն է մեջբերում են Բուքինգհեմյան պալատի մամուլի ծառայությունը։
Արքայազն Էնդրյուն ընդգծել է, որ «կտրականապես հերքում է» իր դեմ ուղղված մեղադրանքները։
2019 թվականին արքայազն Էնդրյուն ստիպված էր հրաժարվել իր պաշտոնական թագավորական պարտականություններից՝ Էփշտեյնի գործի պատճառով առաջացած սկանդալից հետո։ Դա տեղի էր ունեցել, երբ ամերիկուհի Վիրջինիա Ջուֆրեն մեղադրանքներ էր ներկայացրել նրա դեմ՝ պնդելով, որ նա այն մի քանի տղամարդկանցից մեկն էր, որոնց հետ իրեն ստիպել էին սեռական հարաբերություն ունենալ 17 տարեկանում։
Էփշտեյնը Նյու Յորք նահանգի իրավապահ մարմինների կողմից ձերբակալվել էր 2019 թվականի հուլիսի 6-ին։ Մեղադրողները հայտարարել էին, որ նա 2002-2005 թվականներին իր Մանհեթենյան տուն տասնյակ անչափահաս աղջիկների այցելություններ էր կազմակերպել, որոնցից ամենափոքրը 14 տարեկան էր։ Էփշտեյնի ընկերների և ծանոթների շրջանակում էին բազմաթիվ գործող և թոշակի անցած պաշտոնյաներ ոչ միայն ԱՄՆ-ից, այլև շատ այլ երկրներից, հայտնի գործարարներ և շոու-բիզնեսի ներկայացուցիչներ: ԱՄՆ-ում ֆինանսիստի դեմ քրեական գործը կարճվել էր 2019 թվականի օգոստոսի 10-ին՝ բանտախցում նրա ինքնասպանությունից հետո։
