Իշխանությունը խնդիր է դրել կալանավորել բարերար, «Տաշիր» ընկերությունների խմբի նախագահ Սամվել Կարապետյանի պաշտպանական թիմի անդամ, փաստաբան Ռոբերտ Ամստերդամին, գրում է «Ժողովուրդ» օրաթերթը։
Թերթի պնդմամբ՝ «Քաղաքացիական պայմանագիր» կուսակցության ներկայացուցիչները նախօրեին շրջանառել են փաստաբանի խոսքերը՝ իրավապահներին փաստացի հրահանգելով կալանավորել փաստաբանին՝ որակելով վերջինիս հայտարարությունները ՀՀ-ի դեմ։
Ամստերդամը, մասնավորապես, ասել էր, որ Կարապետյանի գործով դիմելու են միջազգային դատարաններ՝ պահանջելով դատապարտել Հայաստանին՝ երկրում քաղբանտարկյալների առկայության համար։
«Մենք ամենօրյա ռեժիմով գրոհելու ենք Հայաստանը, ամենօրյա ռեժիմով, մինչև այդ մարդուն չազատեն (Սամվել Կարապետյան-խմբ)։ Փաշինյանին ամենօրյա ռեժիմով գրոհելու ենք, չենք դադարելու։ Քանի դեռ Փաշինյանը քաղաքական բանտարկյալներ է պահում, ամեն օր բարձրաձայնելու ենք այդ մասին։ Դրանից ավելի հրատապ բան չկա՝ բացառությամբ Ադրբեջանում հայ պատանդների ազատ արձակումը։ Ուզում եմ հստակ հասկանանք, որ առաջնորդվելու ենք բացառապես իրավական միջոցներով, այսինքն՝ կառավարությանը հարցականի տակ չենք դնում, ասում ենք՝ կդիմենք ԵՄ-ին, ԱՄՆ-ին՝ իրազեկելով մարդկանց բռնապետական բնույթի մասին, այն բռնապետի մասին, որը բնակվում է Փաշինյանի և իր տիկնոջ մեջ»,- ասել էր Ամստերդամը։
Սակայն, ըստ ԶԼՄ-ի, ՔՊ-ի պատգամավորներն ու նրանց աջակցող ՀԿ-ները մեկնաբանել են արտահայտությունը որպես «հակապետական սպառնալիք»։
Հակակոռուպցիոն դատարանը հոկտեմբերի 14-ին՝ ժամը 18:00-ից սկսած, քննում էր Կարապետյանի կալանքը երկարաձգելու միջնորդությունը։ Գործարարի կողմնակիցները լսումների ժամանակ հավաքվել էին դատարանի շենքի դիմաց։
Հունիսին Կարապետյանին կալանավորել էին եկեղեցու դեմ արշավը քննադատելուց հետո։ Կարապետյանը մեղադրանքը չի ընդունում՝ այն որակելով քաղաքական:
