Շիրակի թեմի առաջնորդ Միքայել արքեպիսկոպոս Աջապահյանի նկատմամբ քրեական հետապնդման ողջ գործընթացը, այդ թվում՝ նրա կալանավորումն ու «դատական ամբողջ ֆարսը վկայում են, որ իրականում տեղի է ունենում ամենավայրագ ձևերով քաղաքական հետապնդում», հայտարարել է Հայ ազգային կոնգրեսը:
«Տեղի ունեցողը մաս է կազմում Հայ Առաքելական սուրբ եկեղեցու և նրա հոգևոր վերնախավի դեմ իշխանությունների սանձազերծած ապօրինությունների։ Այն միտված է խոսքի և արտահայտվելու ազատության սահմանափակմանը և լուրջ վնաս է հասցնում Հայաստանի միջազգային վարկանիշին»,- նշել է ՀԱԿ-ը։
Աջապահյանը հոկտեմբերի 3-ին դատապարտվել էր 2 տարվա ազատազրկման:
Կոնգրեսն ուշադրություն է հրավիրել այն հանգամանքի վրա, որ դեռևս 2024 թվականին դատախազությունն ու ԱԱԾ-ն արքեպիսկոպոսի հայտարարություններում քրեական հանցագործության տարրեր չէին տեսել և մերժել էին քրեական վարույթ հարուցելու միջնորդությունները։ Սակայն մեկ տարի անց այդ արքեպիսկոպոսի դեմ քրեական վարույթ էր հարուցվել, «երբ գործող իշխանությունը՝ վարչապետ Նիկոլ Փաշինյանի գլխավորությամբ, բացահայտ արշավ էր սկսել եկեղեցու դեմ»։ Սա, ըստ ընդդիմադիր կուսակցության, վկայում է, որ Միքայել սրբազանի նկատմամբ իրականացվող քրեական հետապնդումը «բացառապես քաղաքական հրահանգով պայմանավորված հաշվեհարդար է»։
«Հայ ազգային կոնգրես կուսակցությունը համարում է, որ գերաշնորհ տեր Աջապահյանը քաղաքական բանտարկյալ է, որը կալանավորվել և դատապարտվել է իր հայտարարությունների համար։ Խստորեն դատապարտում ենք արքեպիսկոպոսի նկատմամբ իրականացվող քաղաքական հետապնդումն ու դատարանի կայացրած դատավճիռը»,- ասված է հայտարարության մեջ։
Շիրակի թեմի առաջնորդի փաստաբանները պատրաստվում են բողոքարկել այս որոշումը: Վճիռը քննադատել է նաև Մայր Աթոռ սուրբ Էջմիածինը:
Աջապահյանի նկատմամբ քրեական հետապնդում էր հարուցվել հունիսի 26-ին: Սրբազանը մեղադրվում է իշխանությունը զավթելու կոչի համար: Նա մեղադրանքը չի ընդունում, այն համարում է քաղաքական:
