Հայաստանի էլեկտրական ցանցեր ընկերության ժամանակավոր կառավարչի պաշտոնում Ռոմանոս Պետրոսյանի նշանակումից հետո ՀԷՑ-ից 45-50 աշխատակցի են հեռացրել, օգոստոսի 27-ին տեղի ունեցած ասուլիսում հայտնել է ՀԷՑ-ի գլխավոր տնօրենի նախկին պաշտոնակատար Դավիթ Ղազինյանը, որն իր ազատումը վիճարկում է դատարանում՝ պնդելով իր իրավունքների խախտման մասին։
«ՀԷՑ-ից աշխատակիցներին հեռացնում են նաև ճնշումներով»
Ղազինյանի խոսքով՝ կան նաև աշխատակիցներ, որոնց նկատմամբ ճնշումներ են գործադրվել, ինչից հետո նրանք աշխատանաքից ազատման դիմումներ են գրում։ Ըստ Ղազինյանի՝ նրանք, իրականում, հեռացվածի կարգավիճակ ունեն։ Նա տեղեկացրել է, որ աշխատանքից հեռացրել են հիմնականում ղեկավար պաշտոններ զբաղեցրածներին։
«Մեզ մոտ յուրաքանչյուր ղեկավար պաշտոնյա հստակ գործառույթ է ունեցել, որը չկատարելու դեպքում պարզապես չէր կարող աշխատել։ Մեզ մոտ չենք առաջնորդվել կուսակցական պատկանելությամբ, մտերմությամբ, ինչպես հիմա՝ ՀԷՑ-ում։ Հիմա գլխատելով ՀԷՑ-ը՝ բերում են «Քաղաքացիական պայմանագրի» պարտված թեկնածուների, կուսակցականների։ Նպատակը, միանշանակ, ՀԷՑ-ի լավ աշխատանքը չէ, այլ քաղաքական հայացքներով իրենց դեմ մարդկանցից ազատվելը»,- ընդգծել է Ղազինյանը։
Վերջինս նաև անդրադարձել է Պետրոսյանի այն հայտարարությանը, թե ՀԷՑ-ի գլխավոր տնօրինությունն ու մասնաճյուղերի տնօրենները հուլիս ամսվա համար պարգևավճարներ չեն ստացել, ինչի արդյունքում 20 մլն դրամի լրացուցիչ խնայողություն կա։ Ղազինյանը նշել է, որ Հանրային ծառայությունները կարգավորող հանձնաժողովը սակագին ձևավորելուց ներառում է աշխատավարձային ֆոնդ՝ հստակ սահմանված թվով։
Նա նշել է, որ ՀԷՑ-ի սեփականատեր Սամվել Կարապետյանն ընկերությունը սեփականաշնորհելուց՝ 2015-ից սկսած այդ ֆոնդից զատ՝ մինչ օրս լրացուցիչ 11,6 մլրդ դրամ է հատկացրել աշխատավարձերի համար։
«Դա ամսական կազմում է մոտ 150 մլն դրամ լրացուցիչ գումար։ Եթե շարժվեինք միայն ՀԾԿՀ-ի ֆոնդով, տարեկան 1,5-ից 1,8 մլրդ դրամի դիմաց պետք է կրճատվի կամ այդքան աշխատավարձ կրճատվի։ Հիմա, ընդունենք, որ 150 մլն-ը դեռ սեփականատերը տալիս է, իրենք 20 մլն կրճատել են, ինչը ներկայացնում են որպես բարեգործություն։ Բայց արդյոք ավելի բարոյական չէ՞ր լինի այդ ամենը հայտարարելուց առաջ ասել, որ սրանք ոչ թե սակագնում ներառված աշխատավարձային ֆոնդի, այլ սեփականատիրոջ միջոցներն են»,- հավելել է Ղազինյանը։
Նա շեշտել է՝ սեփականատերն իրավունք ունի այլևս չհատկացնել իր միջոցները, սակայն Կարապետյանը շարունակում է հատկացնել 150 մլն դրամը։
«Ըստ իս՝ Կարապետյանը նույնիսկ անարդար մեթոդների դեպքում այդ քայլը չի անում մի քանի պատճառով։ Առաջինը՝ պետականամետ մարդ լինելն է․ այսինքն՝ նա դրանով չի պատժում կառավարչին, կառավարությանը կամ հանձնաժողովին։ Երկրորդ՝ իր գրպանից տված գումարը կրճատելու դեպքում կրճատումներ կլինեն, բայց ոչ իրենց (իշխանության-խմբ․) բերած մարդկանցից։ Այդ դեպքում կրճատելու են պրոֆեսիոնալ թիմից, ինչն այսօր անում են։ Երրորդն այն է, որ միջոցներն այլևս չտրամադրելու դեպքում ՀԷՑ-ը կործանման է գնալու»,- ասել է նա՝ Պետրոսյանի հայտարարությունը համարելով «պաթոս»։
Ղազինյանը նշել է, որ այսօր ոչ ոք չի խոսում նաև այն մասին, որ Կարապետյանն ընկերությունը սեփականաշնորհելուց՝ 2015-ից հետո առաջին անգամ շահաբաժին է ստացել միայն 2024-ին։
«Կարապետյանը 8 տարի որևիցե դրամ չի վերցրել իր շահույթից։ Որևիցե մեկը չի խոսում նաև այն մասին, որ Կարապետյանն այս պահին ստանալու մոտ 70 մլրդ շահաբաժին ունի։ Իսկ ի՞նչն է խանգարում իր 70 մլրդ շահույթը վերցնել․ այն, որ ՀԷՑ-ն ընդամենը սնանկանալու է»,- ասել է Ղազինյանը։
«Ստոկհոլմի դատարանի որոշումը չկատարալը պետականամետ չէ»
Ղազինյանի խոսքով՝ իշխանությունն իմիտացիա է ստեղծում՝ ցույց տալով, թե, իբր, հարգում է Ստոկհոլմի արբիտրաժային ինստիտուտի միջանկյալ որոշումն այն մասին, որը ՀՀ կառավարությանը պարտավորեցնում է ձեռնպահ մնալ ՀԷՑ-ի բռնագրավմանն ուղղված հետագա այլ քայլերից։
«Իմիտացիա է այն առումով, երբ հայտարարում են, որ հանձնաժողովի նախագահը պետք է որոշի՝ կատարե՞լ, թե՞ ոչ։ Սա պետական գործելաոճ չէ այն առումով, որ եթե պետությունը միանում է ինչ-որ միջազգային պայմանագրի, համաձայնագրի և այն վավերացվում է Ազգային ժողովի կողմից, դառնում է ավելի վեր, քան ներքին օրենսդրական ակտը։ Պատկերացնենք իրավիճակ, երբ ՄԻԵԴ-ն ինչ-որ որոշում կայացնի, ասենք՝ դատական մարմիններն անկախ են և որոշումը չեն կատարում։ Շատ նման իրավիճակ է»,- հավելել է Ղազինյանը։
ՀԷՑ-ի շուրջ գործընթացները մեկնարկել էին, երբ հուլիսի 4-ին Կարապետյանը հայտարարել էր, որ վարչապետ Նիկոլ Փաշինյանը և նրա կառավարությունն «անելիք չունեն Հայաստանում»։ Հուլիսի 14-ին գործարարը հայտնել էր նոր քաղաքական թիմի ձևավորման մեկնարկի մասին։
Օգոստոսին Կարապետյանի շահերը ներկայացնող պաշտպանների խմբին էր միացել ամերիկացի փաստաբան, Հանրապետական կուսակցության ներկայացուցիչ Ռոբերտ Ամսթերդամը, որը գործարարի կալանքը որակել էր քաղաքական որոշում՝ ժողովրդավարության սկզբունքներին և միջազգային իրավական նորմերին հակասող։ Օգոստոսի 15-ին դատարանը 2 ամսով երկարաձգել էր Կարապետյանի կալանքը։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
