Իրանի գերագույն առաջնորդի խորհրդական Ալի Աքբար Վելայաթին հայտարարել է, որ Կովկասը «պատմականորեն Իրանի համար կատարել է անվտանգության ռազմավարական բուֆերի գործառույթ», հաղորդում է Tasnim-ը։
Նշելով, որ տարածաշրջանն այդ դերն ունի Կյուրոս Մեծի ժամանակներից ի վեր, Վելայաթին ընդգծել է, որ Կյուրոսը կովկասյան տարածաշրջանում ամրություններ է կառուցել, որպեսզի պաշտպանի Իրանը քոչվոր ցեղերի ներխուժումներից՝ դրանով իսկ ամրապնդելով այդ տարածաշրջանի անփոփոխ դերը՝ որպես պաշտպանական սահման:
Օգոստոսի 9-ին Վելայաթին, մեկնաբանելով օգոստոսի 8-ին Վաշինգտոնում ԱՄՆ նախագահ Դոնալդ Թրամփի մասնակցությամբ ՀՀ և Ադրբեջանի ձեռք բերված պայմանավորվածությունները, հայտարարել էր, որ Իրանը կխոչընդոտի ամերիկյան «Զանգեզուրի միջանցքի» ստեղծմանը, որը, նրա խոսքով, կհանգեցնի Հայաստանի «ապաինտեգրմանը»։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի, որը պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
Օգոստոսի 12-ին ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագիրը, որն օգոստոսի 9-ին Վաշինգտոնում նախաստորագրվել էր երկու երկրների արտգործնախարարներ Արարատ Միրզոյանի և Ջեյհուն Բայրամովի կողմից։
Կարդացեք նաև՝
ԱՄՆ միջանցքի նախագիծը Հայաստանին տալիս է ժամանակ, բայց ոչ երաշխիքներ․ Սուրեն Պարսյան
