Ամենայն Հայոց կաթողիկոսի Գարեգին Երկրորդի հայրապետական տնօրինությամբ կատարվել են եկեղեցականների նոր նշանակումներ, հայտնում է Մայր Աթոռի լրատվության բաժինը։
Մասնավորապես, Տեր Վաչագան քահանա Գյուրջյանն օգոստոս 1-ից ազատվելով Մայր Աթոռի դիվանատանն ստանձնած պարտականություններից՝ ծառայության կանցնի Ռումինիայի հայոց թեմում։
Բացի այդ, Տեր Տիգրան քահանա Բադիրյանն օգոստոս 1-ից ազատվելով կաթողիկոսական գրասենյակում ստանձնած պարտականություններից՝ ծառայության է նշանակվել Ֆրանսիայի հայոց թեմում։
Մայիսի 29-ից սկսած ՀՀ վարչապետ Նիկոլ Փաշինյանը սոցիալական ցանցերում մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։
Փաշինյանը հուլիսի 20-ին հայտարարել էր իր հետևորդների հետ Վաղարշապատի կենտրոնական հրապարակում «մեծ հոգևոր հանդիպման» մասին։ Մայր Աթոռը, ինչպես նաև Հայոց եկեղեցու պահպանության համահայկական խորհուրդը, վարչապետի հայտարարությունը որակել էին հակասահմանադրական։ Այնուհետև շարունակելով պահանջել կաթողիկոսի հրաժարականը՝ վարչապետն առաջարկել էր նրա հեռացման ծրագիրը նախ սկսել Վեհարանը նրանից «ազատելով», ապա տեղապահ նշանակել որևէ ամուսնացյալ բարեվարք քահանայի, որը չի կարող հավակնել կաթողիկոսի գահին։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
