ԱՄՆ նախագահ Դոնալդ Թրամփը «հսկայական աշխատանք է կատարում Հայաստանի և Ադրբեջանի միջև հակամարտության վերջնական կարգավորման համար», հայտարարել է Ադրբեջանի նախագահ Իլհամ Ալիևը:
Նրա խոսքով՝ Թրամփն ակտիվորեն մասնակցում է Հարավային Կովկասում տեղի ունեցող գործընթացներին։
«Կարծում եմ՝ ապագայում մենք ավելի շատ լավ նորություններ կլսենք»,- Ալիևին մեջբերում են ադրբեջանական լրատվամիջոցները:
Ալիևը նաև հայտարարել է, որ Աբու Դաբիում Հայաստանի վարչապետ Նիկոլ Փաշինյանի հետ հանդիպման ժամանակ քննարկված թեմաներից մեկը «կողմերի միջև վստահության շատ ցածր մակարդակն էր»:
Ադրբեջանի նախագահը կրկին հայտարարել է Հայաստանի սահմանադրության մեջ փոփոխություններ կատարելու և Մինսկի խմբի լուծարման անհրաժեշտության մասին՝ Երևանի և Բաքվի միջև խաղաղության պայմանագրի ստորագրման համար:
Միևնույն ժամանակ՝ Ալիևը հայտարարել է խաղաղության պայմանագրի տեքստը նախապես նախաստորագրելու հնարավորության մասին՝ հավելելով, որ ադրբեջանական կողմն արդեն նման առաջարկով հանդես է եկել Աբու Դաբիում:
«Բայց, ինչպես գիտեք, փաստաթղթի նախաստորագրումը բնավ չի նշանակում դրա ստորագրում։ Այսինքն՝ մի բան է համաձայնության բանավոր արտահայտումը, մեկ այլ բան՝ փաստաթղթի յուրաքանչյուր էջի նախաստորագրումը։ Կարծում եմ՝ մենք շատ մոտ ենք խաղաղության պայմանագրի ստորագրմանը»,- ասել է նա։
«Քարնեգի» կենտրոնը հունիսի 30-ին հայտնել էր, որ ԱՄՆ-ն, փորձելով առաջ մղել խաղաղության գործընթացը, հնարավոր է փորձի համոզել Ադրբեջանին՝ հրաժարվել Հայաստանի սահմանադրության վերաբերյալ պահանջներից։ Հայտարարվել էր, որ Թրամփի վարչակազմն արդեն ներկայացրել է սեփական ծրագիրը Երևանին և Բաքվին՝ Հարավային Կովկասում հաղորդակցությունների ապաշրջափակման վերաբերյալ։ ԱՄՆ պետքարտուղար Մարկո Ռուբիոն հուլիսի 8-ին հույս էր հայտնել, որ հարավկովկասյան երկու երկրների միջև շուտով խաղաղության համաձայնագիր կկնքվի։
ՀՀ վարչապետը և Ադրբեջանի նախագահը բանակցություններ էին վարել հուլիսի 10-ին՝ Աբու Դաբիում: Բանակցությունները տևել էին ավելի քան հինգ ժամ։ Հայաստանի ԱԳՆ-ն հանդիպումը «հաջողված» էր անվանել և հայտարարել, որ այն կարող է լուրջ հիմք հանդիսանալ խաղաղ գործընթացի հետագա իրականացման համար:
Հուլիսի 16-ին Փաշինյանը չէր բացառել խաղաղության պայմանագրի նախաստորագրումը։ Հուլիսի 19-ին Թրամփը հայտարարել էր, որ խաղաղության պայմանագրի ստորագրումը «սարերի հետևում չէ»։
