ՌԴ Պետդումայի ԱՊՀ հարցերով հանձնաժողովի փոխնախագահ Կոնստանտին Զատուլինը Ռուս Ուղղափառ եկեղեցուն կոչ է արել արձագանքել ՀՀ վարչապետ Նիկոլ Փաշինյանի՝ Ամենայն Հայոց կաթողիկոս Գարեգին Բ-ին «հակաքրիստոս» անվանող խոսքերին:
Զատուլինը զարմանք է հայտնել, որ Ռուս Ուղղափառ եկեղեցին չի արձագանքել Փաշինյանի այդ հայտարարություններին։ Ըստ նրա՝ ՌԴ-ն չպետք է լռի՝ սա դիտարկելով որպես ՀՀ-ի ներքին գործ։
«Ռուսաստանը չի կարող ո՛չ հանրային, ո՛չ պետական, իսկ առավել ևս՝ կրոնական մակարդակով ամբողջովին անտարբեր լինել տեղի ունեցածի նկատմամբ։ Հայ Առաքելական եկեղեցին աշխարհում ամենահին քրիստոնեական եկեղեցին է։ Մեր եկեղեցու բարձրաստիճան հոգևորականների կողմից սա անուշադրության մատնելը ճիշտ չի լինի՝ անկախ կողմերից հեռու մնալու և Ադրբեջանի մուսուլմանական հոգևորականության հետ հարաբերություններ չվնասելու ցանկությունից»,- ընդգծել է Զատուլինը։
Պատգամավորի կարծիքով՝ Փաշինյանը նպատակ ունի վարկաբեկել Հայ Առաքելական եկեղեցին՝ որպես հայ ժողովրդի հնարավոր բարոյական հեղինակություն։
Փաշինյանը հուլիսի 8-ին հայտարարել էր, որ Մայր Աթոռ Սուրբ Էջմիածինը «զավթված է հակաքրիստոս, շնաբարո, ապազգային, ապապետական խմբակի կողմից», հավելելով, որ պատրաստվում է Վեհարանի «ազատագրումն առաջնորդել անձամբ»։
Հունիսին Քննչական կոմիտեն հայտնել էր ՀՀ-ում պետական հեղաշրջման փորձը կանխելու մասին։ Այդ գործով կալանավորված է «Սրբազան պայքար»-ի 15 աջակից՝ շարժման առաջնորդ Բագրատ Գալստանյանի գլխավորությամբ:
