Տեղեկատվական տեխնոլոգիաների ոլորտում աշխատող օտարերկրացիներին Վրաստանում կտրվի հատուկ տեսակի կացության թույլտվություն, հայտնել է Apsny-ն:
Կացության նոր տեսակը կսահմանվի «Օտարերկրյա քաղաքացիների և քաղաքացիություն չունեցող անձանց իրավական կարգավիճակի մասին» օրենքում նախատեսվող փոփոխություններով։ Նախագիծն արդեն ներկայացվել է խորհրդարան «Վրացական երազանք» կուսակցության պատգամավորների կողմից։
Հատուկ կացության թույլտվությունը կտրվի օտարերկրացի այն աշխատողներին, ովքեր զբաղվում են տեղեկատվական տեխնոլոգիաների ոլորտում՝ լինի դա վարձու աշխատանք միջազգային ընկերությունում, թե «փոքր բիզնես» կարգավիճակ ունեցող անձ Վրաստանում, ինչպես նաև նրանց ընտանիքի անդամներին։
Թույլտվության դիմորդները պետք է հաշվառվեն Վրաստանի աշխատանքի, առողջապահության և սոցիալական պաշտպանության նախարարությունում՝ ներկայացնելով առնվազն երկու տարվա աշխատանքային փորձը հավաստող փաստաթուղթ, ինչպես նաև տարեկան նվազագույնը 25 000 դոլար եկամուտը հաստատող տեղեկանք։
Տեղեկատվական տեխնոլոգիաների ոլորտի մասնագետների համար նախատեսված հատուկ կացության թույլտվությունը կտրվի 3 տարի ժամկետով՝ հետագա երկարացման հնարավորությամբ մինչև 12 տարի ընդհանուր հաշվով։
Թույլտվության տերը պարտավոր կլինի գտնվել Վրաստանի տարածքում տարեկան առնվազն 183 օր, հակառակ դեպքում՝ կկորցնի իր կարգավիճակը։ Կանխատեսվում է, որ օրենքում նախատեսվող փոփոխությունները մոտ ապագայում կընդունվեն արագացված ընթացակարգով։
