Ստամբուլում Ռուսաստանի և Ուկրաինայի միջև ուղիղ բանակցությունների երկրորդ փուլում Ռուսաստանը երկու մասից բաղկացած հուշագիրը փոխանցել է ուկրաինական կողմին, հայտնում է ՏԱՍՍ-ը։
Ռուսական պատվիրակության ղեկավար, նախագահի օգնական Վլադիմիր Մեդինսկին հայտարարել է, որ Ռուսաստանը և Ուկրաինան պայմանավորվել են «բոլորը բոլորի դիմաց» բանաձևով ծանր վիրավոր և երիտասարդ զինվորների (մինչև 25 տարեկան) լայնածավալ փոխանակման մասին՝ յուրաքանչյուր կողմից առնվազն հազար մարդ: Նա նաև նշել է, որ Ռուսաստանը միակողմանի կարգով կփոխանցի զոհվածների 6000 սառեցված մարմին։
Մեդինսկին հայտնել է, որ առաջարկների երկրորդ մասը ենթադրում է հրադադարի մի շարք ուղիներ։ Նա մանրամասն և մշակված է անվանել ռուսական հուշագիրը։ Պատվիրակության ղեկավարը տեղեկացրել է, որ ռուսական կողմից ռազմաճակատի առանձին հատվածներում երկու-երեք օրով հրադադարի մասին հստակ առաջարկ է արվել: Նրա խոսքով՝ դա թույլ կտա հավաքել զոհվածների մարմինները։
Մեդինսկին հայտարարել է, որ կողմերը քննարկել են նաև երեխաների թեման։ Նա ցույց է տվել Ուկրաինայի փոխանցած 339 ազգանունների ցանկը։ Պատվիրակության ղեկավարի խոսքով՝ Ռուսաստանն առանց բացառության կքննարկի ծնողների հետ կապը կորցրած երեխաների ուկրաինական ցուցակի հետ կապված յուրաքանչյուր իրավիճակ: Նա հայտնել է, որ վերջին շրջանում ռուսական կողմը վերադարձրել է 101 երեխա, իսկ ուկրաինացիները՝ մոտ 20:
Ուկրաինական պատվիրակության ղեկավար, երկրի Պաշտպանության նախարար Ռուստեմ Ումերովը հայտնել է, որ Կիևն առաջարկել է նոր հանդիպում անցկացնել հունիսի 20-30-ն ընկած ժամանակահատվածում:
Ավելի վաղ ուկրաինական կողմը հայտնել էր, որ կողմերը փոխանակվել են կարգավորման փաստաթղթերով, ինչպես նաև պայմանավորվել են գերիների նոր փոխանակումների մասին։ Ռուսական և աւկրաինական պատվիրակությունների բանակցությունները տևել են մեկ ժամից մի փոքր ավելի, հանդիպումը կայացել է Չըրաղան պալատում։
ԱՄՆ նախագահ Դոնալդ Թրամփը մայիսի 28-ին կարծիք էր հայտնել, որ Ուկրաինայում խաղաղ կարգավորման հետ կապված իրավիճակը պարզ կդառնա երկու շաբաթվա ընթացքում:
Կիևն ու Մոսկվան Ստամբուլում մայիսի 16-ին ուղիղ բանակցություններ էին անցկացրել և պայմանավորվել գերիների փոխանակման և բանակցությունները շարունակելու մասին։
