Ազգային ժողովը մայիսի 27-ի նիստում առաջին ընթերցմամբ քննարկում է ՀՀ քրեական օրենսգրքում փոփոխություններ կատարելու Արդարադատության նախարարության նախագիծը, որով պարտադիր զինվորական կամ այլընտրանքային ծառայության զորակոչից, ինչպես նաև վարժական հավաքներից խուսափելու համար ավելի խիստ պատիժներ են սահմանվում։
Արդարադատության նախարարի տեղակալ Գևորգ Քոչարյանը նախագիծը հիմնավորել է ծառայությունից և վարժական հավաքներից խուսափելու վերաբերյալ քրեական վարույթների աճով, որոնք 2024-ին 2023-ի համեմատ ավելացել են 280-ով։
«2023-ին նախաձեռնվել է 1499, իսկ 2024-ին՝ 1779 քրեական վարույթ»,- նշել է փոխնախարարը։
Նրա խոսքով՝ աճի ցուցանիշը վկայում է պատժողական ավելի խիստ քաղաքականության անհրաժեշտության մասին։
«Նախագծով առաջարկվում է զինվորական ծառայությունից խուսափելու համար գործող 2-5 տարի ազատարկման ժամկետն ավելացնել՝ դարձնելով 3-6 տարի։ Վարժական հավաքներից խուսափելու դեպքում առաջարկվում է աշխատավարձի առավելագույնը քսանապատիկի չափով գործող տուգանքը փոխարինել մինչև երեսունապատիկի չափով, իսկ ազատազրկումը գործող 2 տարվա փոխարեն դարձնել 1-ից 3 տարի»,- հավելել է Քոչարյանը։
Փետրվարին ՊՆ-ն առաջարկել էր վարժական հավաքներից խուսափելու մինչև 2 տարի ժամկետով պատիժը դարձնել 2-5 տարի, մայիսի 15-ին կառավարությունը հավանություն էր տվել նախագծին։
