Telegram հավելվածը 2024 թվականի արդյունքներով առաջին անգամ շահույթ է ստացել՝ վաստակելով 540 միլիոն դոլար և ավելացնելով եկամուտները 4 անգամ, տեղեկացնում է Financial Times-ը՝ հղում անելով իր աղբյուրներին:
Ընկերության ներդրողներին ներկայացված շնորհանդեսից պարզ է դառնում, որ 2024 թվականին հաղորդագրությունների և սոցիալական մեդիայի հավելվածի եկամուտները հասել են 1,4 միլիարդ դոլարի, մինչդեռ մեկ տարի առաջ՝ 2023-ին, դրանք կազմել էին ընդամենը 343 միլիոն դոլար։
Եկամուտների շուրջ կեսն ստացվել է, այսպես կոչված, «գործընկերությունների և էկոհամակարգերի» միջոցով, ևս 292 միլիոն դոլար՝ պրեմիում բաժանորդագրություններից, իսկ 250 միլիոն դոլար՝ գովազդից։
Նախորդ՝ 2023 թվականին, ընկերությունը 173 միլիոն դոլար վնաս էր ունեցել։
Telegram-ը հավակնում է 2025 թվականին ունենալ 2 միլիարդ դոլարի եկամուտ, ինչը 46%-ով ավելի է նախորդ տարվա համեմատ։
Telegram-ի համահիմնադիր Պավել Դուրովը 2024-ին ձերբակալվել էր Փարիզի օդանավակայանում, ուր նա Բաքվից ժամանել էր մասնավոր ինքնաթիռով: Դուրովը 2021 թվականից Ֆրանսիայի քաղաքացի է։ Նրան մեղադրանք էր առաջադրվել, սակայն գրավի դիմաց ազատ էր արձակվել: Նշվում է, որ նրա ձերբակալությունը չի ազդել հավելվածի գործունեության վրա, մասնավորապես՝ ընկերության հաշվեկշռում գտնվող կրիպտոարժույթների արժեքի աճի շնորհիվ։
