ՀՀ ոստիկանությունը բացահայտել է Լոռու մարզում կատարված սպանությունը։ Ըստ հաղորդագրության՝ մայիսի 16-ին՝ ժամը 23:20-ին, մարմնի տարբեր մասերի կտրած-ծակած վերքերով ու գանգուղեղի կոտրվածքով Սպիտակի բժշկական կենտրոն էր տեղափոխվել Լոռու մարզի Ծաղկաբեր գյուղի բնակիչ, 29-ամյա Արսեն Կիրակոսյանը, որը հոսպիտալացվելուց մեկ ժամ անց մահացել էր։
Ոստիկանները պարզել են, որ մի խումբ երիտասարդներ հանդիպել են Լոռու մարզի Մեծ Պարնի գյուղից Կաթնաջուր գյուղ տանող ճանապարհին, վիճաբանել են կենցաղային հարցերի շուրջ, այնուհետև պարզաբանումը վերածվել է ծեծկռտուքի։ Այդ ընթացքում մասնակիցներից 28-ամյա երիտասարդը, որը Մեծ Պարնի գյուղի բնակիչ է, քարով, ապա դանակով հարվածներ է հասցրել Կիրակոսյանի մարմնի տարբեր մասերին։
Մեծ Պարնիի 28-ամյա բնակիչը, ինչպես նաև միջադեպին մասնակցած մի խումբ անձինք ձերբակալվել ու ներկայացվել են տարածքային քննչական բաժին, ասվում է հաղորդագրությունում։
