Ցանկացած մեկը, որը պետբյուջեից կոռուպցիոն սխեմայով փող է տանում, իմ անձնական թշնամին է․ վարչապետ

ՀՀ վարչապետ Նիկոլ Փաշինյանը հայտարարել է, որ տեղյակ չէ Նոր Նորքի թաղապետարանում տեղի ունեցած միջադեպի մասին, որի ընթացքում վնասվածքներ էր ստացել ակտիվիստ Արթուր Չախոյանը։

«Ձեր ասած դեպքի մասին առաջին անգամ եմ լսում եմ, որովհետև ավելի կարևոր գործեր ունեմ։ Երկրում ստեղծված են ինստիտուցիոնալ համակարգեր։ Մենք օրենսդրական փոփոխություններ ենք կատարել, և այդ թվում՝ Քննչական կոմիտեն և Հակակոռուպցիոն կոմիտեն գալիս, Ազգային ժողովում հաշվետվություն են տալիս»,- ընդգծել է Փաշինյանը:

Նա հստակեցրել է, որ թաղապետի հարցերով չի զբաղվում, և այդ գործով պետք է զբաղվեն ՔԿ-ն և այլ ինստիտուտներ:

«Իսկ երբ հարցը դառնա քաղաքական, կկիրառվեն քաղաքական որոշակի գործիքներ»,- ասել է նա։

Վարչապետի խոսքով՝ ընդհանուր առմամբ բռնությունն անընդունելի է ինչպես իր, այնպես էլ «Քաղաքացիական պայմանագիր» կուսակցության համար: Դա իշխող ուժի գաղափարախոսության մի մասն է, վստահեցրել է նա։

Փաշինյանն իր «անձնական թշնամի» է անվանել կոռուպցիայի միջոցով բյուջեից փող գողացողին՝ մեկնաբանելով «Հայաստան» խմբակցության պատգամավոր Քրիստինե Վարդանյանի այն խոսքերը, թե Չախոյանը ծեծի է ենթարկվել Նոր Նորքի թաղապետարանում ենթադրյալ կոռուպցիայի մասին հրապարակավ խոսելու համար։ Այդուհանդերձ, միջադեպի մասնակիցների որևէ պատժի մասին Փաշինյանը չի հիշատակել՝ վկայակոչելով անմեղության կանխավարկածը։

«Քանի որ դուք նշեցիք դրվագ, որն այնքան էլ չգիտեմ մանրամասն՝ վկայակոչելով կոռուպցիոն սխեմա և այլն, կարող եմ ասել, որ կոռուպցիոն սխեմայի մեջ ներգրավված որևէ մարդ չի կարող լինել մեր թիմից։ Եթե հանկարծ պարզվի, որ ինքը կոռուպցիոն սխեմայի մեջ ներգրավված է, այդ պահից չի կարող լինել մեր թիմից։ Բացառվում է, որ այդպիսի մարդը լինի մեր քաղաքական թիմից»,- վստահեցրել է Փաշինյանը։

Ապրիլի 29-ին Չախոյանը հայտարարել էր, որ Նոր Նորք վարչական շրջանի ղեկավարն սպառնացել, հայհոյել է իրեն և Երևանի ավագանու «Մայր Հայաստան» խմբակցության անդամ Մեսրոպ Մանուկյանին։ Վերջիններս թաղապետի նկարի վրա հեղուկ էին լցրել։ Չախոյանն ապրիլի 29-ին գրել էր, որ գնալու է թաղապետարան՝ հանրային քննարկմանը մասնակցելու նպատակով:

Ապրիլի 30-ին, երբ Չախոյանն այցելել էր թաղապետարան, ծեծկռտուք էր տեղի ունեցել վարչական շրջանի ղեկավարի, նրա աջակիցների և Չախոյանի միջև, որից հետո վերջինիս ոստիկանությունից վնասվածքներով տեղափոխել էին հիվանդանոց, այնուհետ մեղադրանք առաջադրել։

ՔԿ խոսնակը մայիսի 1-ին տեղեկացրել էր, որ ապրիլի 29-ին տեղի ունեցած դեպքի առթիվ նախաձեռնված քրվարույթի շրջանակներում մի խումբ անձանց կողմից խուլիգանություն կատարելու հատկանիշներով հանրային քրեական հետապնդում էր հարուցվել 2 անձի նկատմամբ։ Ապրիլի 30-ի դեպքի առնչությամբ հանրային քրեական հետապնդում էր հարուցվել 4 անձի նկատմամբ՝ մի խումբ անձանց կողմից ֆիզիկական ներգործության հատկանիշներով։ ԶԼՄ-ները գրել էին, որ մեղադրանք է առաջադրվել նաև Տեր-Մարգարյանին։

Մանրամասները՝ տեսանյութում։