Երևանում հազարավոր քաղաքացիների մասնակցությամբ Հանրապետության հրապարակից մեկնարկել է ջահերով երթը դեպի Ծիծեռնակաբերդի հուշահամալիր՝ ի հիշատակ 1915-1923 թվականներին Օսմանյան կայսրությունում իրականացված ցեղասպանության անմեղ զոհերի։ Այս տարի լրանում է մարդկության դեմ այս հանցագործության 110-ամյա տարելիցը։
Երթի կազմակերպիչներն ընդգծել են, որ այն սգո միջոցառում չէ, այլ արդարադատության պահանջի արտահայտություն։ Նրանք դա համարում են թուրքական կառավարության դեմ ուղղակի բողոք՝ ցույց տալու, որ հայ ժողովրդի դիմադրությունը մեկ դար շարունակ չի մարել։
Միջոցառումը կազմակերպած ՀՅԴ կուսակցության երիտասարդական թևի ներկայացուցիչները նշել են, որ երթը լուսաբանվում է նաև միջազգային հանրության կողմից։ Աշխարհն այսպիսով արձանագրում է, որ Ցեղասպանության հարցը կմնա չբուժված վերք հայերի համար, մինչև պատմական արդարությունը չվերականգնվի։
Ջահերթի ամենատարածված ավանդույթը թշնամի պետություններ համարվող Թուրքիայի և Ադրբեջանի դրոշների այրումն է՝ ի նշան Հայոց ցեղասպանության ժխտման քաղաքականության դեմ բողոքի։
Ջահերով երթի այս համահայկական ակցիան, սակայն, ունի այլ ավանդույթներ։ Օրինակ՝ երթն առաջնորդում են հոգևորականները, որոնք տանում են քրիստոնեության խորհրդանիշ խաչը։
Այս օրը շատ քաղաքացիներ մոմեր են դնում իրենց պատուհանների մոտ՝ լուսավորելով երթի ուղին և խորհրդանշական կերպով միանալով ակցիային։
Ամբողջ երթուղու երկայնքով լսվում են արդարություն պահանջող կարգախոսներ, սակայն Ծիծեռնակաբերդ բարձրանալու ընթացքում երթի մասնակիցները պահպանում են լիակատար լռություն։
Երթում կարևոր տեղ է զբաղեցնում հիսուն մետր երկարությամբ հսկայական եռագույն դրոշը։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Մարտին Հայաստանի վարչապետ Նիկոլ Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Դիվանագիտության և հիշողության միջև. ինչպե՞ս է Հայաստանի արտաքին քաղաքականությունը հասել Ցեղասպանության միջազգային ճանաչմանը
Ուրուգվայից մինչև ԱՄՆ. Հայոց ցեղասպանության ճանաչման ուղին
