Եվրոպական խորհրդարանի մի շարք պատգամավորներ ապրիլի 3-ին կայացած լիագումար նիստի ժամանակ ոգեկոչել են Օսմանյան կայսրությունում Հայոց ցեղասպանության 110-րդ տարելիցը և զուգահեռներ անցկացրել 2023 թվականի սեպտեմբերին Արցախում տեղի ունեցած էթնիկ զտումների հետ, հայտնում է ՀՅԴ Բյուրոյի Հայ դատի կենտրոնական գրասենյակը։
Խորհրդարանականները Թուրքիային և Ադրբեջանին կոչ են արել ճանաչել Հայոց ցեղասպանությունը՝ որպես հաշտեցման կարևոր քայլ և խստորեն քննադատել ԵՄ-ի շարունակական համագործակցությունն Ադրբեջանի հետ՝ չնայած վերջինիս գործողություններին։
Պատգամավոր Մարկետա Գրեգորովան հայտարարել է, որ անցյալի ոճիրների հիշատակումը պետք է վերածվի ներկա անարդարությունների դեմ գործողությունների։
«Մենք չենք կարող շարունակ փակել մեր աչքերը, երբ դա հարմար է մեզ»,- ասել է նա՝ ընդգծելով Լեռնային Ղարաբաղից հայերի բռնի տեղահանումը և նշելով, որ ԵՄ երկրները շարունակում են գազ ներմուծել Ադրբեջանից և պահպանում են համագործակցության հուշագիրը Բաքվի հետ։
Իսպանացի պատգամավոր Պերնանդո Բարենա Արզան ԵՄ-ին կոչ է արել վճռականորեն դատապարտել Ադրբեջանի գործողությունները և չմոռանալ հայ փախստականների ու քաղաքական բանտարկյալների ճակատագիրը, որոնք ենթարկվում են «կեղծ դատավարությունների և վճիռների»։
Հույն պատգամավոր Յանիս Մանիատիսը ԵՄ-ին կոչ է արել ավելացնել ճնշումը Թուրքիայի վրա՝ «իր անցյալի հանցագործությունները» ճանաչելու համար։
Ֆրանսիացի պատգամավոր Մարի Թուսենը շեշտել է, որ Հայոց ցեղասպանությունը մնում է «բաց վերք հայ ժողովրդի և եվրոպացիների հիշողության մեջ»։
Նա ընդգծել է այդ հիշողությունը պահպանելու և ժխտման դեմ պայքարի բարոյական պարտքը։ Թուսենը ցեղասպանության պատմական արդարությունը կապել է հայ ժողովրդի ներկայիս տառապանքների հետ՝ մատնանշելով Ադրբեջանում բանտարկված քաղաքական գործիչներին, Լեռնային Ղարաբաղից տեղահանված հարյուր հազարավոր մարդկանց՝ ովքեր զրկված են վերադարձի իրավունքից։
«Պատմությունը կրկնվում է այլ ձևերով, բայց նույն անպատժելիությամբ»,- նշել է նա։
Ապրիլին ԱՄՆ չորս կոնգրեսական Ներկայացուցիչների պալատ էր ներկայացրել Հայոց ցեղասպանության վերաբերյալ կրթական ծրագիր իրականացնելու օրինագիծ։ Ապրիլի 24-ին կնշվի Օսմանյան կայսրությունում Հայոց ցեղասպանության՝ 20-րդ դարի առաջին ցեղասպանության 110-րդ տարելիցը։ Այդ օրը հայերը և քաղաքակիրթ աշխարհը հարգանքի տուրք են մատուցում մարդկության դեմ հրեշավոր ոճրագործության զոհերի հիշատակին, որը խլել է ավելի քան մեկուկես միլիոն հայի կյանք։
Մեկ դար անց՝ 2023 թվականին, Թուրքիայի կողմից աջակցվող Ադրբեջանի իշխանությունների կողմից տեղի էր ունեցել հայերի էթնիկ զտումների երկրորդ գործողությունը սեփական հայրենիքում, որի արդյունքում ավելի քան 100 000 արցախահայեր լքել էին իրենց տները Լեռնային Ղարաբաղում: Armenia Today-ի խմբագրակազմը հավաքել է առանցքային, մեր կարծիքով, օբյեկտիվ և փաստերի վրա հիմնված գիտական հետազոտություններ ցեղասպանության վերաբերյալ, արվեստի գործեր և դժոխքի տանջանքներից փրկված մարդկանց հիշողություններ։
