Ռազմական հակամարտությունը գրեթե անխուսափելի է, եթե Իրանի միջուկային ծրագրի մասին նոր համաձայնագրի շուրջ բանակցությունները ձախողվեն, հայտարարել է Ֆրանսիայի արտգործնախարար Ժան-Նոել Բարոն։
«Հնարավորությունների պատուհանը նեղ է: Մենք ընդամենը մի քանի ամիս ունենք մինչև այս համաձայնագրի (կնքվել է 2015-ին) ժամկետի ավարտը: Եթե այն ձախողվի, ռազմական առճակատումը գրեթե անխուսափելի կլինի», - մեջբերում է Reuters-ը Բարոյի խոսքերը:
Գործակալությունը, հղում անելով աղբյուրներին, հայտնել է, որ ավելի վաղ Ֆրանսիայի նախագահ Էմանուել Մակրոնը նախարարների և փորձագետների հանդիպում է անցկացրել՝ քննարկելու Իրանի շուրջ ստեղծված իրավիճակը։ Reuters-ի գնահատմամբ՝ հանդիպումն ընդգծում է Վաշինգտոնի եվրոպացի դաշնակիցների աճող մտահոգությունը, որ ԱՄՆ-ն և Իսրայելը կարող են օդային հարվածներ հասցնել Իրանի միջուկային օբյեկտներին, եթե միջուկային համաձայնագիրն արագ ձեռք չբերվի:
Ավելի վաղ արևմտյան լրատվամիջոցներում նոր հրապարակումներ էին հայտնվել Իրանին ԱՄՆ-ի եւ Իսրայելի հարվածների հնարավորության մասին։
Daily Express թերթը, հղում անելով Թրամփի վարչակազմին մոտ կանգնած աղբյուրին, հայտնել է, որ «Իրանի ժամանակը սպառվում է»։ «Եթե նա չպատասխանի նախագահ Թրամփի առատաձեռն պայմաններին՝ իր միջուկային հնարավորությունների ամբողջական աուդիտի և ապամոնտաժման թույլտվության դիմաց, Իրանը կվերանա մինչև սեպտեմբեր»,- աղբյուրի խոսքերն է մեջբերել հրատարակությունը։
Իր հերթին, The Daily Mail-ը, հղում անելով աղբյուրներին, նշել էր, որ ԱՄՆ-ը ծրագրում է «առաջիկա շաբաթների ընթացքում» հարվածներ հասցնել Իրանի միջուկային օբյեկտներին։
Փետրվարին Թրամփը հրամանագիր էր ստորագրել Իրանի նկատմամբ առավելագույն ճնշման քաղաքականությունը վերականգնելու մասին։ Ավելի ուշ նա հայտնել էր, որ նամակ է ուղարկել Իրանի գերագույն առաջնորդ Ալի Խամենեիին՝ միջուկային ծրագրի քննարկման առաջարկով։ Խամենեին ասել էր, որ Թեհրանը պատրաստ է պատասխանել ԱՄՆ-ի ցանկացած ագրեսիվ գործողության, ինչպես նաև մերժել էր Վաշինգտոնի հետ բանակցությունների հնարավորությունը։
